ئەنجومەنی باڵای دادوەریی عێراق ڕایگەیاند، دادگای لێکۆڵینەوەی ڕەسافە کە تایبەتە بە دۆسیەکانی دەستپاکی و سپیکردنەوەی پارە، توانیویەتی بڕی 20 ملیار دیناری عێراقی لە دۆسیەیەکی گەندەڵیی دارایی و کارگێڕیدا بگەڕێنێتەوە.

بەپێی ڕاگەیەندراوێکی ناوەندی ڕاگەیاندنی دادوەری، پرۆسەی گێڕانەوەی ئەو بڕە پارەیە لەسەر بنەمای ئاشکرابوونی چەند تاوانێکی گەندەڵیی دارایی و کارگێڕی، هەروەها تاوانەکانی فێڵکردنی دارایی ئەنجام دراوە.

لە ڕاگەیەندراوەکەدا جەخت لە بەردەوامیی ڕێکارە یاساییەکان کراوەتەوە بەرامبەر بەو سەرپێچیکارانەی کە شێوازی نایاسایی بەکاردەهێنن بۆ بەدەستهێنانی قازانج و زیان بە سامانی گشتی دەگەیەنن.