باڵیۆزخانەی ئەمەریکا لە ئوردن، ئەمڕۆ شەممە، هۆشدارییەکی توندی ئەمنی بڵاوکردەوە و داوا لە هاووڵاتییانی دەکات بەهۆی ئاڵۆزییەکانی ڕۆژهەڵاتی ناوەڕاستەوە ئامادەکاری بۆ جێهێشتنی ناوچەکە بکەن، هاوکات پێشبینی هەڵوەشاندنەوەی گەشتە ئاسمانییەکان و داخستنی کاتیی ئاسمانی ناوچەکەش دەکات.

باڵیۆزخانەکە لە ڕاگەیەندراوەکەیدا ئاماژەی بەوە کردووە، ڕەوشی ئەمنیی ڕۆژهەڵاتی ناوەڕاست ئاڵۆزە و ئەگەری پەرەسەندنی چاوەڕواننەکراوی هەیە، بۆیە دەبێت ئەمەریکییەکان هۆشیاربن و لە ئەگەری ئاڵۆزبوونی زیاتری دۆخەکەدا ئامادەبن بۆ جێهێشتنی ناوچەکە. باسی لەوەش کردووە کە هەڵوێستەکانی ئێران پێشبینینەکراون و مەترسیی ئەوە هەیە ئێران و گروپە نزیکەکانی، دامەزراوە دیپلۆماسییەکان و بەرژەوەندییەکانی ئەمەریکا لە سەرانسەری جیهان بکەنە ئامانج، تەنانەت ژێرخانی مەدەنی وەک هۆتێل و فڕۆکەخانەکانیش.

لە بەشێکی دیکەی بەیاننامەکەدا، باڵیۆزخانەی ئەمەریکا لە ئوردن بەتایبەتی داوا لە هاووڵاتییانی دەکات خۆیان بەدوور بگرن لە سەردانیکردنی بنکە سەربازییەکان لەناو خاکی ئوردن و تێکەڵنەبوون بە شوێنی خۆپیشاندان و گردبوونەوەکان. هەروەها داوا لەو ئەمەریکییانە دەکات کە لە دەرەوەی ڕۆژهەڵاتی ناوەڕاستن، بە جددی پێداچوونەوە بە بڕیاری گەشتکردنیان بۆ ناوچەکە بکەن و بەردەوام چاودێری ڕێنماییە ئەمنییەکانی تایبەت بە فڕۆکەخانەکان بکەن.