عەباس عێراقچی، وەزیری دەرەوەی کۆماری ئیسلامیی ئێران، ڕەخنەی توند لە هەنگاوەکانی ویلایەتە یەکگرتووەکانی ئەمریکا دەگرێت سەبارەت بە گەرووی هورمز و ڕایدەگەیەنێت، دەبوو واشنتۆن بۆ کردنەوەی هەر ڕێگایەکی جیاواز لەو گەرووەدا ڕاوێژ بە تاران بکات.

وەزیری دەرەوەی ئێران ئاماژەی بەوە کرد، مادەی پێنجەمی یاداشتنامەی لێکتێگەیشتن زۆر ڕوونە و تێیدا جەخت کراوەتەوە کە ئێران میکانیزمی تێپەڕین بە گەرووی هورمزدا دیاری دەکات. هاوکات پێیوایە، کردنەوەی ڕێگایەکی جیاواز لەلایەن ئەمریکاوە، بەتەواوی پێچەوانەی بڕگەکانی ئەو یاداشتنامەیەیە و لەگەڵیدا ناگونجێت.

عێراقچی ڕوونیشیکردەوە، پێویست بوو واشنتۆن پێش زیادکردن یان لابردنی هەر ڕێڕەوێک لە گەرووی هورمز بۆ ئەوەی بخرێتە ناو مادەی پێنجەمەوە، پرس و ڕاوێژی بە ئێران بکردایە.

 ئاشکراشیکرد، دوای پێکدادانەکانی گەرووی هورمز و لە کاتی دانوستانەکانی سویسرا، هەردوو لا بڕیاریانداوە هێڵێکی ڕاستەوخۆی پەیوەندیکردن بکەنەوە، بۆ ئەوەی هیچ جۆرە لێکتێنەگەیشتنێک دروست نەبێت.