لیژنەی دەستپاکی لە ئەنجومەنی پارێزگای دیوانیە، دەستگیرکردنی ژمارەیەک بەرپرس و بەڵێندەری بە تۆمەتی گەندەڵی لە فەرمانگەی شارەوانیی شارەکە ڕاگەیاند.

ئەحمەد سەقەر باشات، سەرۆکی لیژنەکە ڕایگەیاند؛ هێزێکی ئەمنیی هاوبەش لە دەزگای ئاسایشی نیشتمانی و شانەی هەڵۆکانی هەواڵگری، بە هەماهەنگی لەگەڵ دەستەی دەستپاکیی فیدراڵی، ئۆپەراسیۆنێکی ئەمنییان ئەنجامداوە و تێیدا ژمارەیەک بەرپرسی فەرمانگەی شارەوانیی دیوانیە و چەند بەڵێندەرێک بە تۆمەتی تێوەگلان لە دۆسیەکانی گەندەڵی دەستگیرکراون.

سەرۆکی لیژنەی دەستپاکی لە ئەنجومەنی پارێزگای دیوانیە ئاماژەی بەوەشکرد، ئۆپەراسیۆنەکە دوای ئاشکرابوونی چەند دۆسیەیەکی گەندەڵی دێت و هێزە ئەمنییەکان توانیویانە دەست بەسەر چەندین مامەڵە و مۆردا بگرن کە گومان دەکرێت سەر بە فەرمانگەی شارەوانیی دیوانیە بن و لەکاتی ئۆپەراسیۆنەکەدا لەلای تۆمەتبارەکان بوون.

جەختیشی کردەوە کە لێکۆڵینەوەکان تا ئەم ساتەش بەردەوامن بۆ زانینی تەواوی وردەکارییەکان، تاوەکو دۆسیەکان ئامادە دەکرێن و تۆمەتباران ڕووبەڕووی دادگا دەکرێنەوە.