دەوڵەت باخچەلی، سەرۆکی پارتی بزووتنەوەی نەتەوەیی (مەهەپە)، پێشنیاری دروستکردنی "ناوەندی هەماهەنگیی ئاشتی و بەسیاسیکردن" دەکات و ڕایدەگەیەنێت، پێویستە پێگەی یاسایی عەبدوڵا ئۆجەلان دیاری بکرێت بۆ ئەوەی ڕۆڵ لە بنەبڕکردنی تیرۆر و چەکداناندا ببینێت.

ئەمڕۆ سێشەممە (5ی ئایاری 2026)، دەوڵەت باخچەلی لە کۆبوونەوەی فراکسیۆنی پارتەکەی لە پەرلەمانی تورکیا، پێشنیارێکی بێپێشینەی لەبارەی دۆخی عەبدوڵا ئۆجەلانەوە خستەڕوو و وتی: "بۆ کۆتاییهێنان بە مشتومڕەکان لەسەر دۆخی یاسایی ئۆجەلان، پێشنیار دەکەین میکانیزمێک بەناوی 'ناوەندی هەماهەنگیی ئاشتی و بەسیاسیکردن' پێکبهێنرێت".

سەرۆکی مەهەپە ئاماژەی بەوەشکرد، ئەگەر بۆشایی یان ناڕوونییەک لە پێگەی یاسایی ئۆجەلاندا هەبێت، دەبێت ئەو دۆخە بە جۆرێک پێناسە و ڕاست بکرێتەوە کە خزمەت بە ئامانجی "تورکیایەکی بێ تیرۆر" بکات. هیوایشی خواست کە سەرکردەی دامەزرێنەری پەکەکە (عەبدوڵا ئۆجەلان) بتوانێت لە چوارچێوەیەکی فەرمی و دیاریکراودا، ڕۆڵێک بگێڕێت کە ببێتە هۆی هەڵوەشاندنەوەی تەواوەتی تیرۆر و دانانی چەک.

باخچەلی بە ئاماژەدان بە ساڵیادی بەستنی کۆنگرەی دوانزەیەمینی پەکەکە (کە لە ئایاری 2025 بڕیاری چەکدانانی تێدا درا)، جەختی لە بەردەوامیی پرۆسەی ئاشتی کردەوە و وتی: "ئاشتی وەک باڵندەیەکە کە پێویستی بە دوو باڵ هەیە؛ باڵێکیان بڕیاری هەڵوەشاندنەوەی گرووپەکە بوو، باڵەکەی تریشی ئیرادەی نەتەوە و پەرلەمانە بۆ بەرەوپێشبردنی ئەم پرۆسەیە".

ئەم لێدوانانەی باخچەلی لە کاتێکدایە، هەر ئەمڕۆ و هاوکات لەگەڵ ساڵیادی بڕیاری چەکدانان، گرووپەکانی نزیک لە پەکەکە بەیاننامەیەکیان بڵاوکردەوە و تێیدا داوایان لە حکومەتی تورکیا کرد هەنگاوی یاسایی بۆ دیاریکردنی پێگەی (ستاتۆ) عەبدوڵا ئۆجەلان بنێت.