فەرماندەی بارەگای ناوەندیی خاتەمولئەنبیا ڕایدەگەیەنێت، ئاسایشی گەرووی هورمز لەدەست هێزە چەکدارەکانی کۆماری ئیسلامیی ئێراندایە و هۆشداریش دەداتە هێزە بیانییەکان، بەتایبەت سوپای ئەمریکا، کە ئەگەر بەبێ هەماهەنگی نزیکی گەرووەکە ببنەوە، ڕووبەڕووی هێرش دەبنەوە.

لیوا عەلی عەبدوڵڵاهی، فەرماندەی بارەگای ناوەندیی خاتەمولئەنبیا لە لێدوانێکدا ڕایگەیاند: "بە هەموو توانامانەوە ئاسایشی گەرووی هورمز دەپارێزین و بەهێزەوە بەڕێوەی دەبەین، داواش لە سەرجەم کەشتییە بازرگانی و نەوتهەڵگرەکان دەکەین، خۆیان بەدوور بگرن لە تێپەڕین بەبێ هەماهەنگی لەگەڵ هێزە چەکدارەکانمان لە گەرووەکەدا، بۆ ئەوەی ئاسایشیان نەکەوێتە مەترسییەوە."

هەروەها ئاماژەی بەوەش کردووە، سەرکردەکان و سوپای ئەمریکا لە ئاوە نێودەوڵەتییەکاندا دەستیان داوەتە "چەتەیی دەریایی" و ئاسایشی ئابووریی جیهانیان خستووەتە مەترسییەوە، جەختیشیکردووەتەوە کە ئێران وەڵامێکی قورس و پەشیمانکەرەوەی بۆ هەر هەڕەشە و دەستدرێژییەک دەبێت لە هەر ئاستێکدا بێت.

لە کۆتاییشدا هۆشداری داوەتە هاوپەیمانەکانی ئەمریکا کە ئاگادار بن و هەنگاوێک نەنێن دواتر پەشیمانی بەدوادا بێت، چونکە هەوڵەکانی ئەمریکا تەنها دۆخەکە ئاڵۆزتر دەکات و ئاسایشی کەشتییەکان لە ناوچەکەدا دەخاتە مەترسییەوە.