وەفدێکی بزوتنەوەی گۆڕان بە سەرۆکایەتی رۆڤان سەروەت ئەندامی ئەنجومەنی سیاسی لە بەغدا سەردانی خالید شوانی وەزیری دادی عێراقیان کرد.

وەفدەکەی گۆڕان کە پێکهاتبوو لە هەریەک لە زمناکۆ جەلال و چۆمان محەمەد ئەندامانی ئەندامانی جڤاتی نیشتمانی لە کۆبوونەوەکەدا پیرۆزباییان لە خالید شوانی کرد بە بۆنەی دەستبەکاربوونیەوە و پشتیوانی خۆیان بۆ ئەو و سەرجەم نوێنەرانی کورد لە بەغدا دەربڕی.

وەفدەکەی گۆڕان جەختیان لەوەکردەوە، کە پێویستە کاربەدەستان و نوێنەرانی کورد لە بەغدا هەموو هەوڵەکانیان چڕ بکەنەوە بۆ چەسپاندنی "مافە دەستوورییەکانی هەرێمی کوردستان" کە لە دەستووردا جێگیرکراون و سەرسەختانەتر داکۆکی لەو پرسانە بکەن کە پەیوەندی بە مافەکانی هەرێمی کوردستانەوە هەیە.

راشیانگەیاند: پەیامی گۆڕان ئەوەیە کە بەهێزی کورد لە بەغدا و کاری پێکەوەیی لە بەغدا گەرنتی سەرکەوتنی پرۆسەی سیاسییە لە عێراق و هەرێمی کوردستان.

لای خۆیەوە وەزیری دادی عێراق بەخێرهاتنی وەفدەکەی گۆڕانی کرد و هیوای سەرکەوتنی بۆ خواستوون.