لە هەنگاوێکی نوێدا لە کەرتی بازرگانی و بۆ ڕێگری لە گەندەڵی عێراق دەیەویت سیستەمی ئاسیکۆدا جێبەجێ بکرێت

ئاسیکۆدا سیستمێکی کۆمپیوتەریی پێشکەوتووە بۆ بەڕێوەبردنی کاروباری گومرگی ئەم سیستمە لەلایەن ڕێکخراوی نەتەوە یەکگرتووەکان بۆ بازرگانی و گەشەپێدان داڕێژراوە کۆتایی بە مامەڵەی کاغەز دەهێنێت

ئاسیکۆدا چییە و چۆن کار دەکات؟
- ئامانجی سەرەکی ئەم سیستمە مۆدێرنکردنی کارە گومرگییەکان و خێراکردنی پرۆسەی بازرگانییە لە ڕێگەی گۆڕینی مامەڵەکان بۆ ئەلیکترۆنی
- لەڕێگەی ئەم سیستەمەوە هەموو ڕێکارە گومرگییەکان، لە کاتی گەیشتنی کاڵا تا دەرچوونی، بە شێوەی ئەلیکترۆنی ئەنجام دەدرێت
- سیستمەکە بە وردی باج و ڕسوماتە گومرگییەکان هەژمار دەکات، ئەمەش ڕێگری دەکات لە هەڵەی مرۆیی و گەندەڵی دارایی
- سیستمەکە دەتوانێت دیاری بکات کام بارە پێویستی بە پشکنینی وردە و کامەیان دەکرێت ڕاستەوخۆ تێپەڕێت


بڕیاری پەرلەمانی عێراق بۆ یەکخستنی ئەم سیستەمە لە هەموو دەروازەکان ئامانجی گەورەی لەپشتە

1. هەموو سنوورەکان بە یەک کۆد و یەک پرۆسە کار دەکەن، ئەمەش ڕێگری دەکات لە قاچاخچێتی و تێپەڕینی باری بێ مۆڵەت
2. دڵنیایی دەدات کە هەموو داهاتێکی گومرگی ڕاستەوخۆ دەچێتە خەزێنەی دەوڵەت
3. بەهۆی ئەلیکترۆنیبوونی پارەدان لە ڕێگەی ئەم سیستەمەوە کۆتایی بە پێدانی بەرتیل دەهێنێت و بازرگانان پێویستیان بە پەیوەندی ڕاستەوخۆ لەگەڵ فەرمانبەران نابێت


گرنگی جێبەجێکردنی لە عێراق و هەرێم بۆ بازرگانان

لە داهاتوویەکی نزیکدا، بازرگانان دەتوانن لە ماڵ یان نووسینگەکانی خۆیانەوە لە ڕێگەی ئینتەرنێتەوە بەڵگەنامەکان پێشکەش بکەن و ڕسوماتەکان بە شێوەی ئەلیکترۆنی لە ڕێگەی بانکەوە بدەن.