فالح ساری، وەزیری دارایی عێراق لە میانەی پێشوازیکردنی لە ئیمانوێل سالیناس مونۆز، نوێنەری بانکی نێودەوڵەتی لە عێراق، جەختی لە بەردەوامبوونی وەزارەتەکەی کردەوە بۆ جێبەجێکردنی بەرنامەکانی چاکسازیی دارایی و ئابووری، بە شێوەیەک کە لەگەڵ کارە لەپێشینەکانی بەرنامەی حکومەتدا بگونجێت و کواڵیتی بەڕێوەبردنی سەرچاوە گشتییەکان بەرز بکاتەوە.

وەزیری دارایی ئاماژەی بەوەش کرد، لە قۆناغی داهاتوودا سوورن لەسەر گرتنەبەری ڕێڕەوی چاکسازی کە پشت بە پەرەپێدانی ژینگەی دارایی و بانکی دەبەستێت، لەگەڵ فراوانکردنی جێبەجێکردنی سیستەمی ئەلیکترۆنی لە کەرتەکانی باج و گومرگدا. هەروەها پاڵپشتیکردنی داهاتە نانەوتییەکان و ئاسانکاریکردن لە ڕێکارەکان بە ئامانجی باشترکردنی ئاستی دامەزراوەکان و بووژاندنەوەی چالاکییە ئابوورییەکان.

لە کۆبوونەوەکەدا هەردوولا میکانیزمەکانی بەهێزکردنی هەماهەنگیی هونەری و دامەزراوەییان لەگەڵ بانکی نێودەوڵەتی تاوتوێ کرد، بە مەبەستی پاڵپشتیکردنی پڕۆژەکانی گەشەپێدان و ژێرخان، بەهێزکردنی کەرتی تایبەت و سوودوەرگرتن لە ئەزموونە نێودەوڵەتییەکان بۆ جێبەجێکردنی چاکسازییەکان.

لای خۆیەوە، نوێنەری بانکی نێودەوڵەتی بەردەوامیی پاڵپشتیی بانکەکەی بۆ بەرنامەکانی چاکسازیی حکومەتی عێراق دووپات کردەوە، بە جۆرێک کە خزمەت بە گەشەپێدانی ئابووری و بەرزکردنەوەی توانای دامەزراوە داراییەکان بکات.