عێراق پێشوازی لە دانوستانەکانی نێوان ئەمەریکا و ئێران دەکات و بە هەوڵێک بۆ سەقامگیریی و کەمکردنەوەی گرژییەکانی ناوچەکە ناوی دەبات.

هەواڵ:KNNC

وەزارەتی دەرەوەی عێراق ڕاگەیەندراوێکی بڵاوکردەوە و پێشوازی لە دانوستانەکانی نێوان ئەمەریکا و ئێران کرد و بە هەوڵێک بۆ سەقامگیریی ناوی برد.

وەزارەتی دەرەوە ئاماژەی بەوەداوە، پێشوازی لە گفتوگۆکانی نێوان ئەمەریکا و ئێران دەکەن و هەنگاوێکی ئەرێنییە بە ئاراستەی کەمکردنەوەی گرژییەکان و بەهێزکردن و هێنانە کایەی دەرفەتەکانی گفتوگۆ.

وەزارەتەکە جەختی لەوەش کردوەتەوە، کە عێراق پشتگیری تەواوی خۆی بۆ هەوڵەکانی کەمکردنەوەی گرژیی و بەهێزکردنی سەقامگیریی و ئاسایش لە ناوچەکەدا دووپات دەکاتەوە، ئەمەش لەسەر بنەمای باوەڕی بە گرنگی پەیڕەوکردنی گفتوگۆ و دیپلۆماسی وەک ڕێگەیەک بۆ چارەسەری ناکۆکییەکان.

هاوکات وەزارەتی دەرەوەی عێراق سوپاس و پێزانینی خۆی بۆ ڕۆڵی عوممان دەربڕیوە، لە میواندارییکردن و ئاسانکارییکردنی گفتوگۆکاندا و بە پاڵپشتیکاری سەقامگیریی ناوی هێناوە...