فەرماندەیی ناوەندیی ئەمەریکا  ڕایگەیاند؛ لە ئۆپراسیۆنێکدا لە ناو خاکی سوریا, توانیویانە پلاندانەری باڵای هێرشەکانی پەیوەست بە ڕێکخراوی قاعیدە بکەنە ئامانج و بیکوژن، دەشڵێن؛ کوژراوەکە هەڕەشەیەکی ڕاستەوخۆی  بۆ سەر ئاسایشی ناوچەکە و بەرژەوەندییەکانی ئەمریکا دروستکرد بو.

هەواڵ:KNNC

فەرماندەیی ناوەندیی ئەمریکا لە رۆژهەڵاتی ناوەڕاست(سێنتکۆم) لە ڕاگەیەندراوێکدا لەسەر پلاتفۆرمی X ڕایگەیاندوە؛ هێزەکانیان لە 2ی تشرینی یەکەمدا هێرشێکی وردیان لە سوریا ئەنجامداوە و بەهۆیەوە محمد عەبدولوەهاب ئەحمەد، پلاندانەری باڵای هێرش و ئەندامی ئەنسارولئیسلام، کە گروپێکی تیرۆریستی پەیوەست بە قاعیدەیە کوژراوە.

ئاماژەیان بەوەشداوە کە محمد عەبدولوەهاب هەڕەشەیەکی ڕاستەوخۆی بۆ سەر ئاسایشی ناوچەکە و بەرژەوەندییەکانی ئەمریکا دروستکردبو دەشڵێن؛ کە ئۆپەراسیۆنەکە بەشێکە لە هەوڵە بەردەوامەکان بۆ بەئامانجگرتنی سەرکردە تیرۆریستییەکان و تێکدانی تواناکانی پلاندانان و جێبەجێکردنیان.

لە ڕاگەیەندراوەکەدا لە زاری ئەدمیرال براد کوپەر، فەرماندەی فەرماندەیی ناوەندیی ئەمەریکاوە هاتوە، "هێزەکانی ئەمریکا لە ڕۆژهەڵاتی ناوەڕاست بەردەوام لە ئامادەباشیدان بۆ تێکدان و تێکشکاندنی هەوڵەکانی تیرۆریستان بۆ پلاندانان و ڕێکخستن و جێبەجێکردنی هێرشەکانیان".

کوپەر ئاماژەی بەوەشکرد، هێزەکانی ئەمریکا بەردەوام دەبن لە بەرگریکردن لە نیشتمان و پاراستنی شەڕڤانان و هاوپەیمانان و هاوبەشەکانمان لە ناوچەکە و دەرەوەی ناوچەکە.