پەرلەمانی ئێران پرۆژەیەکی هەموارکردنی یاسای دراو و بانکیی پەسەند کرد، کە تێیدا لابردنی چوار سفر لە پارەی نیشتمانی  پێشنیاز کرابو، بە ئامانجی سادەکردنی مامەڵە داراییەکان و بەرزکردنەوەی سەقامگیری دراوی وڵاتەکە.

هەواڵ:KNNC


دوای ئەوەی لە دانیشتنێکی گشتیدا  پڕۆژە یاسای لابردنی سفرەکان، خرایە دەنگدانەوە لە نێو پەرلەمانی ئێران بە زۆرینەی دەنگی 144 دەنگی بەڵێ و 108 دەنگی نەخێر و 3 دەنگی بێلایەن، مادەکانی ڕەشنووسی هەموارکردنەوەکە پەسەندکرا.

بە گوێرەی یاساکە، پێویستە  بانکی ناوەندی ئێران لە ماوەی دوو ساڵدا ڕێکخستنە جێبەجێکارییە پێویستەکان بۆ دەستپێکردنی قۆناغی گواستنەوە وەربگرێت و لە ڕێگەی ڕۆژنامەی فەرمی و پلاتفۆرمە ئەلیکترۆنیەکان و دەزگاکانی ڕاگەیاندنی نیشتمانییەوە بە فەرمی ئەوە ڕابگەیەنێت.

ئاماژە بەوەشکراوە کە  ڕێساکانی جێبەجێکردن لە ماوەی سێ مانگدا ئامادە دەکرێت و ئەم بڕیارە لە چوارچێوەی هەوڵەکانی حکومەت دێت بۆ بەرزکردنەوەی کارایی سیستەمی دراو و ئاسانکاری مامەڵەی دارایی ڕۆژانەی هاوڵاتیان و دەستەبەرکردنی سەقامگیری نرخ لە بازاڕە ناوخۆییەکان.

جێی باسە لە ئێستادا ئێران لە قەیرانێکی دارایی و ئابوری قورسدایە و دوای سەپاندنەوەی سزاکانیش بەسەریدا لەلایەن رۆژئاواوە، قەیرانەکان قوڵتربونەتەوە و هاوڵاتیانی ئەو وڵاتە لە دۆخێکی ئابوری سەختدا ژیان دەگوزەرێنن.