باڵیۆزخانەى ئەمەریکا لە عێراق ئاشکرایدەکات کە باڵیۆزخانەکەیان لە 21 و 22ـى ئەم مانگە دەستیان بە کشانەوەى کارمەندەکانیان کردوە و هۆشداریش دەدەن لەوەى ئەگەرى هێرشکردنەسەر کارمەند و هاوڵاتییانیان هەیە و داوا دەکەن خۆیان بپارێزن.

هەواڵ:KNNC

باڵیۆزخانەکە لە راگەیەنراوێکدا دەڵێت: وەک بەشێک لە هەوڵەکانیان کە لە 12ـى ئەم مانگە دەستیان پێکرد، دوێنێ و ئەمڕۆ کارمەندى زیاتریان عێراقى جێهێشتوە و باڵیۆزخانەی ئەمەریکا لە بەغدا و کۆنسوڵخانەی گشتی لە هەولێر بەشێوەیەکی کاتی هەمو خزمەتگوزارییە ئاساییەکانی ڤیزەیان راگرتوە و تەنها خزمەتگوزاریی پێشکەش هاوڵاتییانى ئەمەریکى دەکەن.

ئاماژە بۆ ئەوەشکراوە کە  ئەگەری زۆری توندوتیژی رێکخراوە بیانییەکان هەیە کە کارە بازرگانییەکانی ئەمەریکا و ئەو شوێنانە بکەنە ئامانج کە هاوڵاتییانی ئەمەریکی زۆر سەردانیان دەکەن بۆیە  داوا دەکەن کە  هەمو هاووڵاتییانی ئەمەریکی لە عێراق خۆیان بەدوربگرن لەو شوێنانەی بیانییەکان زۆر سەردانیان دەکەن و خۆیان لە هەر کۆبونەوە و قەرەباڵغییەکی گەورە بپارێزن.

هەروەک  هۆشداریش دەدەن بە هاوڵاتییانیان کە پێویستە ئەمەریکییەکان بە هیچ هۆکارێک گەشت بۆ عێراق نەکەن.