وەزارەتی رۆشنبیری دەڵێت: میدیای كوردی دەتوانێت رۆڵی گرنگ لە پاراستنی ئاسایشی كۆمەڵایەتی و بنكەی بێلایەنی هەرێم بگێڕێت، هەردەزگایەکی راگەیاندن هەواڵی بێبنەما بۆ تێكدانی ئاسایشی هەرێمی كوردستان و ترس و تۆقاندن بڵاوبكاتەوە، روبەڕوی لێپرسینەوەی یاسایی دەكرێتەوە.


هەواڵ: (KNNC)


وەزارەتی رۆشنبیری حكومەتی هەرێمی كوردستان رایگەیاند: ئەمڕۆ ناوچەكە بە دۆخێكی هەستیاردا تێدەپەڕێت، راگەیاندن ئامرازێكی كاریگەرە و میدیای كوردی دەتوانێت رۆڵی گرنگ لە پاراستنی ئاسایشی كۆمەڵایەتی و بنكەی بێلایەنانەی هەرێمی كوردستان لە روداوەكانی ناوچەكەدا بگێڕێت.


ئەوەیخستوەتەڕو، لەم سۆنگەیەوە ئاگاداری سەرجەم كەناڵەكانی راگەیاندن و پەیج و دەزگا میدیاییەكان دەكەنەوە؛ پێویستە رەچاوی ئاسایشی كۆمەڵایەتی و باری دەرونیی خەڵك بكرێت و هیچ جۆرە هەواڵێكی بێسەرچاوە و نادروست، دەربارەی پەرەسەندنەكانی ناوچەكە و لێكەوتەكانی بڵاونەكرێتەوە كە لایەنگریی تێدابێت.


وەزارەتی رۆشنبیری حكومەتی هەرێمی كوردستان ئاماژەی بۆ ئەوەشكردوە؛ هەمولایەك بەرپرسیارانە مامەڵە لەگەڵ روداو و پێشهاتەكان بكەن و هەمو جۆرە هەواڵێك لەبارەی ئەمنییەتی كوردستان و زانیاری دەربارەی روداوەكان، تەنها لە سەرچاوەی رەسمی وەردەگیرێت، هەر لایەن و دامەزراوەیەكی میدیایی و بەكارهێنەرانی سۆشیال میدیا، هەواڵی بێبنەما بۆ تێكدانی ئاسایشی هەرێمی كوردستان و ترس و تۆقاندن بڵاوبكاتەوە، روبەڕوی لێپرسینەوەی یاسایی دەكرێتەوە.