سەرۆكی کۆمەڵەی پەنابەرە گەڕاوەکانی ئەوروپا  ئاشکرایکرد کە لە 10 ساڵی رابردودا، زیاتر لە 148 هەزار کەس لە هەرێمى کوردستانەوە، کۆچیان کردوە بۆ ئەوڕوپا و لەو ماوەیەشدا 414 کەس بونەتە قوربانی.

هەواڵ:KNNC

بەکر عەلی، سەرۆكی کۆمەڵەی پەنابەرە گەڕاوەکانی ئەوروپا رایگەیاند: لە 10 ساڵی رابردودا لە سەرجەم ناوچەكانی هەرێمی کوردستانەوە، 148 هەزار و 400 كەس کۆچیان کردوە بۆ ئەوروپا و لە ناویاندا وڵاتی بەریتانیا.

وتیشی: لەو ماوەیەدا، 414 کەس بونەتە قوربانی و تا ئێستا چەندین کەسیش بێ سەرو و شوێنن.

ئاماژەی بەوەش کرد: لەو 10 ساڵەدا، 33 هەزار و 800 کەس لە سنوری ئیدارەی راپەڕین کۆچیان کردوە و 112 کەسیش بونەتە قوربانی.

سەرۆكی کۆمەڵەی پەنابەرە گەڕاوەکانی ئەوروپا، رەخنەى لە دەسەڵات و لایەنە پەیوەندیدارەکانى هەرێمى کوردستان گرت و وتى: بە داخەوە لایەنە پەیوەندیدارەكان، نەیانتوانیوە پاڵپشت بن بۆ باشتركردنی ژیانی هاوڵاتییان و وتیشى: نەبونی هەلی كار، نەبونی خزمەتگوزاری و سەروەرنەبونی یاسا، لە هۆکارە کاریگەرەکانى زۆربونى رێژەى کۆچکردنن.