وەزارەتی دەرەوەی ئێران، ناڕەزایەتی توندی بەرانبەر راگەیاندنی کۆتایی لوتکەی عەرەبی دەربڕی کە تێیدا باس لە خاوەندارێتی ئیمارات بەسەرژمارەیەک دورگەدا دەکات، وەزارەتەکە دوپاتی کردوەتەوە ئەو دورگانە بەشێکی دانەبڕاوی خاکی ئێرانن.

هەواڵ:KNNC

ئیسماعیل بەقایی، وتەبێژی وەزارەتی دەرەوەی ئێران بڵاویکردوەتەوە، ئەو بانگەشەیەی لە ڕاگەیەندراوی کۆتایی لوتکەی عەرەبی بەغدا، سەبارەت بە دورگە کێشە لەسەرەکانی کەنداو، (تونبی گەورە، تونبی بچوک و ئەبو موسا) هاتوە، قبووڵ نەکراوە.

جەختی کردوەتەوە، ئەو سێ دورگەیە بەشێکی دانەبڕاون لە خاکی ئێران و دەڵێت: کۆماری ئیسلامیی ئێران هەر بانگەشەیەک بۆ خاوەندارێتی ئەو دورگانە بە پێچەوانەی بنەماکانی یاسای نێودەوڵەتی سەبارەت بە ڕێزگرتن لە یەکێتیی خاک و سەروەریی وڵاتەکەی لە قەڵەم دەدات.

شەممە 17ی ئایار 34هەمین لوتکەی عەرەبی لە بەغداد بەڕێوەچو و لە بەشێکی ڕاگەیەنراوی کۆتایی لوتکەکە دا جەختی لە خاوەندارێتی ئیمارات بەسەر سێ دورگەی کەنداو کراوەیەوە.