لوتكەی عەرەبی لەبەغدادی پایتەخی عێراق كۆتایی بەكارەكانی خۆی هێنا و وڵاتانی بەشداربو داوا لە كۆمەڵگەی نێودەوڵەتی دەكەن هەوڵ بۆ راگرتنی جەنگی غەززە بدەن، هاوكات جەختدەكەنەوە؛ ئامانج لە بەڕێوەچونی لوتكەی عەرەبی یەكخستنی هەوڵەكان و بەدیهێنانی بەرژەوەندیی وڵاتانی عەرەب.

هەواڵ: (KNNC)

ئەمڕۆ شەممە (2025/5/17) لە دوای كۆتای هاتنی (34)ـهەمین لوتكەی عەرەبی لەبەغداد وڵاتانی بەشداربو، راگەیەندراوێكیان بڵاوكردەوە كە تیایدا هاتوە: بەتوندی هێرشەكانی ئیسرائیل بۆ سەر سوریا ئیدانە دەكەن، وداواش لە كۆمەڵگەی نێودەوڵەتی دەكەن هەوڵەكانیان بۆ راگرتنی جەنگی غەززە چڕ بكەنەوە.

ئەوەشیانخستوەتەڕو، راگواستنی گەلی فەلەستین لە كەرتی غەززە بەهەمو شێوەیەك رەتدەكەنەوە و پێویستە دەست بكرێتەوە بە گەڕاندنەوەی هاوكارییە مرۆییەكان بۆ كەرتی غەززە.

لەسەر ئەو باروندۆخەی بەسەر سوداندا هاتوە، هیوایانخواستوە كە چارەسەرێكی سیاسی بۆ شەڕ و  ئاڵۆزییەكانی ئەو وڵاتەش بدۆزرێتەوە،

راگەیەندراوەكەی لوتكەی عەرەبی لە بەغداد ئاماژەی بۆ ئەوەشكردوە؛ ئامانج لە بەڕێوەچونی لوتكەی عەرەبی یەكخستنی هەوڵەكان و بەدیهێنانی بەرژەوەندیی وڵاتانی عەرەبی.