دەستەی گشتى کەشناسی و بومەلەرزەزانی عێراق رایگەیاند، لە ماوەی  مانگی نیسانی رابردودا 16 بومەلەرزە لە عێراق رویانداوە کە زۆرینەیان لە هەرێمی کوردستان بون .

دەستەکە لە بەیاننامەیەکدا ئاماژەی بەوەکردووە، تەنها لەمانگی نیساندا ئامێرەکانی هەستیاری بومەلەرزە 24 بومەلەرزەیان تۆمارکردووە کە 16 یان لە خاکی عێراق و هەشت دانەشیان لە ناو ئێران و تورکیادا بووە و سەرجەمیشیان پلەکانیان لە نێوان 2 بۆ 4 پلەی رێختەردا بون.

ئاشکراشى کردووە، زۆربەى بومەلەرزەکان لە ناوچەکانی پارێزگای سلێمانی و کەلار و دیالە و مەندەلی رویانداوە، بەڵام هیچ زیانێکی گیانی و مادی لێنەکەوتووەتەوە.

لە روی جیۆلۆجییەوە عێراق و هەرێمی کوردستان دەکەونە سەر پلێتیى عەرەبی کە لەگەڵ پلێتی بانی ئێران یەکیگرتووە و هەزاران ساڵە چالاکی بوومەلەرزە لەناوچەکەدا هەیە.