شارەزایەکی کەشناسی ڕایدەگەیەنێت، بەهۆی کاریگەریی نزمەپاڵەپەستۆیەکی دەریای سوورەوە، لە سبەینێ پێنجشەممەوە شەپۆلێکی ناجێگیریی کەشوهەوا ناوچەکانی هەرێمی کوردستان و عێراق دەگرێتەوە و پێشبینیی دروستبوونی هەورەبرووسکە و تاوەباران دەکرێت.

ئاراس جەبار، شارەزای کەشناسی بڵاویکردەوە، لە ئێستادا ڕێژەی شێ لە ناوچەکانمان بەرز دەبێتەوە و لە کاتەکانی بەیانیی سبەینێ پێنجشەممەوە، لە ناوچەکانی ڕۆژئاوای عێراق و هەرێمی کوردستان گۆڕانکاری لە کەشوهەوادا دەستپێدەکات، کە دروستبوونی کەڵەکەهەوری برووسکە و ناوبەناو تاوەبارانی کورتخایەنی لاواز بۆ مامناوەند لەخۆ دەگرێت.

ئاماژەی بەوەشکردووە، لە دوانیوەڕۆ و ئێوارەی هەمان ڕۆژدا، کاریگەریی شەپۆلەکە درێژ دەبێتەوە بۆ هەریەک لە پارێزگاکانی هەولێر، کەرکووک، سلێمانی و هەڵەبجە، لەگەڵ ئیدارەکانی سۆران، ڕاپەڕین و بەشێک لە باکووری گەرمیان.

باسی لەوەشکردووە، بەگشتی بڕی بارانەکە زۆر نابێت، بەڵام بەهۆی ناجێگیریی کەشوهەواوە ئەگەر هەیە لە هەندێک ناوچە تاوەبارانی بەخوڕ ببارێت و لە هەندێک شوێنی دیکەش تەنها نمەباران بێت.

ئەو شارەزایەی کەشناسی پێشبینیش دەکات، ئەم دۆخەی ناجێگیریی کەشوهەوا بۆ ڕۆژانی داهاتوو و هەفتەی ئایندەش بە هەمان شێوە لەسەر ناوچەکانمان بەردەوامیی هەبێت.