شارەزایەکی بواری کەشناسی ڕایدەگەیەنێت، لەمڕۆوە شەپۆلێکی بارانبارین و سەرمایەکی جەمسەری ڕوو لە هەرێمی کوردستان دەکات و پلەکانی گەرما بەشێوەیەکی بەرچاو دادەبەزن، کە ئەمەش بە یەکەم دەستپێکی بارانی وەرزی نوێ یان "بارانی هەنار" دادەنرێت.

سالار حاجی عەلی، شارەزای بواری کەشناسی، ئاشکرای کرد کە لە ئەمڕۆوە شەپۆلێکی بارانبارین و سەرما دەست پێدەکات و بەهۆیەوە پلەکانی گەرما بە بڕی هەشت بۆ 10 پلەی سیلیزی نزم دەبنەوە. ئاماژەی بەوەش کرد کە لە قۆناغی یەکەمدا، کەشوهەوا ناسەقامگیر دەبێت و ئەگەری تاوەباران و هەورەبروسکە لە ناوچەکانی دهۆک، زاخۆ، سۆران و ناوچە شاخاوییەکانی هەولێر هەیە.

لە درێژەی لێدوانەکەیدا، ئەو شارەزایەی کەشناسی ڕوونیکردەوە کە لە قۆناغی دووەمدا و لە 30ی ئەیلوول بۆ چواری تشرینی یەکەم، شەپۆلەکە گشتگیر دەبێت و بەهۆی هاتنی بارستەهەوایەکی ساردی جەمسەرییەوە تەواوی ناوچەکانی هەرێم دەگرێتەوە. پێشبینیشی کرد کە لە ڕۆژانی دوو و سێی تشرینی یەکەمدا، ئاستی بارانبارین فراوانتر بێت و بگاتە سەنتەری شارەکانیش.

سەبارەت بە بڕی بارانی پێشبینیکراو، سالار حاجی عەلی خستیەڕوو کە لە دهۆک دوو بۆ سێ ملیمەتر، هەولێر یەک بۆ دوو ملیمەتر، سلێمانی و هەڵەبجە 0.5 بۆ 1.5 ملیمەتر، و لە کەرکوک یەک بۆ دوو ملیمەتر باران دەبارێت. هەرچەندە لە ناوچە شاخاوییەکان بڕی بارانەکە زیاتر دەبێت، بەڵام جەختی کردەوە کە ڕێژەکان زۆر خێرا ئەگەری گۆڕانکارییان هەیە بۆ زیادبوون یان کەمبوون.