کۆرۆنا ملیارێک و (600) ملیۆن خوێندکار لە خوێندن بێبەش دەکات

KNN : Kurdish News Network
02:22 - 24/01/2021
جیهان

نەتەوە یەکگرتووەکان لە رۆژى جیهانى پەروەردەدا رایدەگەیەنێت؛ کۆرۆنا بۆتە هۆى ئەوەى ملیارێک و (600) ملیۆن خوێندکار لە خوێندن بێبەشبن.

ئەمڕۆ (24ى کانونى دووەم)، رۆژى جیهانى پەروەردەیە و ئامانج لە دانانى ئەو رۆژەش جەختکردنەوەیە لەسەر گرنگى رۆڵى پەروەردە لەسەر ژیانى تاک و کۆمەڵگە کە دەبێتە هۆى گەشەپێدان و بەرەوپێشچون رۆشنبیرى کۆمەڵگە لەسەرجەم بوارەکان.

لە راپۆرتى ساڵانەى خۆیدا کە لە رۆژى جیهانى پەروەردەدا بڵاوى کردۆتەوە رێکخراوى نەتەوە یەکگرتووەکان ئاماژەى بە بێبەشبونى ژمارەیەکى زۆر منداڵ و خوێندکار کردووە لە پڕۆسەى خوێندن لە سەرتا سەرى جیهان.

بەپێى راپۆرتى نەتەوە یەکگرتووەکان، یەک ملیار و (600) ملیۆن منداڵ لە (190) وڵاتى  جیهان، بەهۆى بڵاوبونەوەى ڤایرۆسى کۆرۆنا بە خوێندن بێبەشبوون.

ئاشکراشیکردوە، لەسەرتاسەرى جیهاندا  (617) ملیۆن منداڵ بەهۆکارى جیاوازى ئابورى و رۆشنبیرى و شەڕ و کۆچ نەیانتوانیوە بچنە بەر پڕۆسەى خوێندن.

ئەوە لە کاتێکدایە، بەپێى ماددەى (25) ى بەیاننامەى مافەکانى مرۆڤ، پێویستە خوێندن بێ بەرامبەر و بەناچارى بێت و هەموو کەسێکیش بێ جاوازى مافى خوێندنى هەبێت.

لە هەرێمى کوردستانیش بەهەمان شێوەى وڵاتانى دونیا، بەهۆى بڵاوبونەوەى ڤایرۆسى کۆرۆنا و قەیرانى دارایى ماوەى دوو ساڵە پڕۆسەى پەروەردە لە پاشەکشەدایە و ئەمساڵ بەهۆى ئەو بارودۆخەوە تا ئێستا دەرگاى قوتابخانەکان بەڕوى زۆربەى قۆناغەکانى خوێندندا نەکراوەتەوە.

 

117 جار خوێندراوەتەوە