دەستەی دەستپاکی فیدراڵی، ئەمڕۆ سێشەممە، دەستگیرکردنی بەڕێوەبەری بەشی موڵکایەتی لە شارەوانی تکریتی ڕاگەیاند، ئەوەش بەهۆی بوونی گومانی تێوەگلانی لە یاریپێکردن بە پرۆسەی دابەشکردنی زەوی، هاوکات دەستیشبەسەر چەندین تاپۆ و بەڵگەنامەی خانوبەرە و مامەڵەی گواستنەوەی خاوەندارێتیدا گیراوە.

دەستەکە لە ڕاگەیەندراوێکدا ئاماژەی بەوە کردووە: "تیمێکی بەڕێوەبەرایەتی لێکۆڵینەوەی سەڵاحەدین توانیویانە بەڕێوەبەری بەشی موڵکایەتی لە شارەوانی تکریت دەستگیر بکەن، ئەوەش لەسەر دۆسیەی یاریپێکردن بە دابەشکردنی زەوی".

ئەوەشی خستووەتەڕوو: "لە ئەنجامی ئۆپەراسیۆنەکەدا توانراوە دەستبەسەر (94) تاپۆی خانوبەرەدا بگیرێت، لەگەڵ دۆزینەوەی بڕێک پارە بە دینار و دۆلار و بڕێک زێڕ لە ماڵی تۆمەتبارەکەدا".

هەر لە ڕاگەیەندراوەکەدا هاتووە، کە تیمەکە دەستیان بەسەر چەندین سەنەدی دیکەی موڵکایەتی و مامەڵەی تەرخانکردن و گواستنەوەی خاوەندارێتیدا گرتووە، جەختیشیکردووەتەوە کە بەپێی یاسا ڕێکارە یاساییە پێویستەکان بەرامبەر تۆمەتبارەکە گیراونەتەبەر.