بەم نیشانانە؛ ئەنفلۆنزا و هەڵامەت لە کۆرۆنا جیابکەرەوە

KNN : Kurdish News Network
09:48 - 22/11/2020
تەندروستی

لەم وەرزەدا كەسانێكی زۆر توشی پەتا وەرزییەكانی وەك ئەنفلۆنزا و هەڵامەت دەبن، ئەوەش ترسێكی زۆر لای هاوڵاتیان دروست دەكات و زۆر كەس وادەزانێت توشی كۆرۆنا بووە چونكە چەند نیشانەیەكیان لە یەك دەچن.

 

 
پسپۆڕانی تەندروستی ئاشكرای دەكەن، ئەنفلۆنزا و هەڵامەت دوو حاڵەتی جیاوازن توشی كۆئەندامی هەناسە و سییەكان و لوت و قورگ دەبن، چەند ڕۆژی یەكەمی توشبوون بەو نەخۆشییە بەهۆی لێكچونی نیشانەكانیان ئەوا ناتوانرێت لێك جودا بكرێنەوە، بەڵام بەتەواوی لەگەڵ كۆرۆنا جیاوازە و بەزووی جیادەكرێتەوە.

 

جیاوازی نێوان كۆرۆنا و ئەنفلۆنزا و هەڵامەت، لەو ڤایرۆسەدایە كە هۆكاری توشبوونن بە نەخۆشییەكان هەروەها لە نیشانەكانیشدا تاڕادەیەك جیاوازیان هەیە، بەجۆرێك ئەنفلۆنزا نیشانەكانی قورسترە و بریتین لە بەرزبونەوەی پلەی گەرما و هەستكردن بەهیلاكی و ئازاری سەر و  ئازاری ماسولكەكان, لەگەڵ بونی چەند كێشەیەك لە كۆئەندامی هەناسەداندا، ئەمە تاڕادەیەك لە نیشانەكانی كۆرۆناوە نزیكە بەڵام بە ئەنجامدانی پشكنین بە ئاسانی جیادەكرێتەوە.
بەڵام نیشانەكانی هەڵامەت سوكترن و ئەو كەسەی توشی دەبێت زیاتر ڕوبەڕووی كۆكە و پژمە و هەوكردنی قوڕگ و گیرانی لوت دەبێتەوە.

 

پسپۆڕەكان باس لەوەش دەكەن كە هەڵامەت نیشانەی مەترسیداری لەگەڵدا نییە، بەڵام ئەنفلۆنزا هەندێ جار هۆكار دەبێت و بۆ توشبون بە هەوكردنێكی سییەكان.

1316 جار خوێندراوەتەوە