پزیشکێکی پسپۆڕی نەخۆشییەکانی پێست هۆشداری دەدات لەوەی گۆڕانی ڕەنگ و شێوەی نینۆکەکان تەنها کێشەیەکی ڕواڵەتی نییە، بەڵکو نیشانەیە بۆ بوونی چەندین کێشەی تەندروستی لە جەستەدا. حاڵەتەکانی وەک کەمیی ئاسن، کێشەی ڕژێنی دەرەقی و تەنانەت نەخۆشییەکانی دڵ و سییەکانیش ڕەنگدانەوەیان لەسەر نینۆکەکان دەبێت.

دکتۆرە یێکاتێرینا ئەنبیلۆگۆڤا ئاماژە بەوە دەکات، لە کاتی کەمیی ئاسندا نینۆکەکان تەنک دەبن و شێوەیەکی چاڵ هاوشێوەی کەوچک وەردەگرن. هەروەها تێکشکانی بەردەوامی نینۆک ئاماژەیە بۆ بەدخۆراکی یان نەخۆشییە درێژخایەنەکان. هاوکات دەرکەوتنی نینۆکی خڕ و چەمانەوەی سەری پەنجەکان، زۆرجار لەلای تووشبووانی نەخۆشییەکانی دڵ و سییەکان دەردەکەوێت.

لە بارەی گۆڕانی ڕەنگی نینۆکیشەوە، ئەو پزیشکە ڕێنمایی دەدات کە دەرکەوتنی خاڵی سپی دوای زەبر یان جوانکاری شتێکی باوە، بەڵام دەرکەوتنی هێڵی ڕەش و کشانەوەی لەسەر نینۆک پێویستی بە پشکنینی خێرا هەیە. هۆشداریش دەدات کە لە هەندێک حاڵەتی دەگمەندا، ئەم ڕەشبوونەوەیە نیشانەیە بۆ جۆرێکی مەترسیداری شێرپەنجە لە نینۆکەکەدا.