هەڵبژاردنى سەرۆک کۆمارى قوبروسى تورکى بۆ خولى دوەم درێژکرایەوە و رکابەرى سەرەکیش لە نێوان لایەنگرێکى حکومەتى تورکیا و دژەکەى ماوەتەوە.

دوێنێ هەڵبژاردنى سەرۆک کۆمارى قوبروسى تورکى بەبەشدارى (11) کاندید کە حەوت لە کاندیدەکان سەربەخۆبون و بەڕێوەچو، کە تێیدا (198) هەزار و (957) دەنگدەرى ئەو وڵاتە لە (736) سندوقدا دەنگیاندا.

دواى کۆتایى هاتنى پڕۆسەى هەڵبژاردنەکە، شەوى رابردو ئەنجامەکەى راگەیەنرا، بەڵام هیچ کام لە کاندیدەکان نەیانتوانى دەنگى پێویست کە (50+1) بەدەست بهێنیت، بۆیە هەڵبژاردن بۆ خولى دوەم درێژکرایەوە کە رۆژى (18)ى ئەو مانگە بەڕێوە دەچێت.

لە خولى دوەمدا، ئەو دو کاندیدەى لە خولى یەکەمدا زۆرترین دەنگیان بەدەستهێناوە رکابەرى یەکترى دەکەن و زۆرینەى سادە دەبێتە براوەى هەڵبژاردن.

لە خولى یەکەمدا، ئەرسین تەتار سەرۆک وەزیرى ئێستاى قوبروس (32.3)ى دەنگەکانى بەدەستهینا و مستەفا ئاکنجى سەرۆک کۆمارى ئێستاى قوبروس (29.8)ى دەنگەکانى بەدەستهێنا.

ئەرسین تەتار لەلایەن حکومەتى تورکیا (ئەکەپە)وە پشتگیرى دەکرێت و مستەفا ئاکنجیش سەرۆک کۆمارى ئێستاى قوبروسى تورکى لایەنگرى سیستمى فیدڕاڵى و یەکگرتنى هەردو قوبرسەکەیە، کە ئەوەش دژە بە سیاسەتى حکومەتى تورکیا.

ساڵى (1974) دواى دەستێوەردانى سەربازى تورکیا، قوبروس بو بە دو بەش و قوبروسى یۆنانى لەلایەن هەمو جیهانەوە ناسراوە و ئەندامى یەکێتى ئەوروپایە، هەرچى قوبروسى تورکییە تەنها لەلایەن تورکیاوە دانیپێدانراوە و لەسەر ئاستى جیهانى دانپێدانراو نیە.