پەرلەمانتارێکی عێراق ڕایگەیاند، ئەمڕۆ پەرلەمان ناتوانێت دەنگدان بە کاندیدی وەزارەتەکانی (نەوت و دەرەوە) یەکلایی بکاتەوە، بەهۆی ئەوەی ئەو دوو کاندیدە ناکۆکی لایەنە سیاسییەکانیان لەسەرە.

ئەحمەد کینانی پەرلەمانتاری عێراق بە بەشی عەرەبی دیجیتاڵ میدیای KNN ی راگەیاند، بەپێی کارنامەی کۆبونەوەکە، بڕیارە ئەمڕۆ پەرلەمان کۆببێتەوە و دەنگ لەسەر کاندیدی وەزارەتە بەتاڵەکانی کابینەکەی مستەفا کازمی بدات.

ئاماژەی بەوەشکرد، ئەمڕۆ ناتوانرێت دەنگدان لەسەر کاندیدی وەزارەتەکانی ( نەوت، دەرەوە) یەکلا بکرێتەوە، بەهۆی ئەوەی ئەو دوو کاندیدە ناکۆکی توندی لایەنە سیاسییەکانیان لەسەرە.

پەرلەمانتارەکەی عێراق دەشلێت، دەنگدان لەسەر کاندیدی وەزارەتەکانی (نەوت و دەرەوە) پێویستی بە رەزامەندی سەرجەم لایەنە سیاسییەکان هەیە، بەهۆی ئەوەی ئەو کاندیدانە دەبێت کەسایەتی و تایبەتمەندییەکی دیاریکراوییان هەبێت.

ئەو وەزارەتە بەتاڵانەی بریارە ئەمڕۆ لە کۆبونەوەی پەرلەمانی عێراق دەنگیان لەسەر بدرێت بریتین لە؛( نەوت، دەرەوە، داد، بازرگانی،کشتوکاڵ، کۆچ وکۆچبەران و وەزارەتی رۆشنبیری).