یەکی نیسان ئەو رۆژەیە کە لە جیهاندا وەک نەریتێک "درۆ"ی تێدا دەکرێت، تەنانەت وەک بۆنەیەکی لێهاتوە و هاوڕێ و خزمان "درۆ"ی گەورە دەکەن لەپێناو دڵخۆشی و هەندێکجار خەڵەتاندنی بەرامبەرەکانیان، ئەم نەریتە تەنانەت میدیاشی گرتوەتەوە، هەندێکجاریش ئەو نەریتە بوەتە هۆی زیانگەیاندن و تەنانەت بونە قوربانیی کەسانێک لە ئەنجامی بێ متمانەییان بەو زانیارییانەی لەو رۆژەدا  بڵاوکراونەتەوە.

رۆژی یەکی نیسان کە هەندێک بە (درۆی نیسان) ناوی دەبەن، لە سەرانسەری جیهان وەك هۆكارێكی دڵخۆشی و ئاسودەبەخش لێی دەڕوانرێت، بەگشتی لەم رۆژەدا یەكێك گاڵتە یان درۆیەک دەکات بۆ هەڵخەڵەتاندنی بەرامبەرەکەی و بەزمەسات و کەیفخۆشی.

زیاتر وا باوە کە سەرەتای رۆژ یان تا ناوەڕاستی رۆژەکە "درۆ" دەکرێت، چونکە کەمتر کەسی بەرامبەر هەست دەکات یەکی نیسانە و گاڵتە و درۆی لەگەڵدا کراوە.

لە یەکی نیسانی هەمو ساڵێکدا لە جیهاندا بەشێواز و نەریتی جیاواز ئەو یادە دەکرێتەوە، بەڵام ئەمساڵ کە هاوکاتە لەگەڵ بڵاوبونەوەى ڤایرۆسى کۆرۆنا لە جیهاندا و هەموو جوڵە و چالاکیەک وەستاوە و هاوڵاتیان بۆ خۆپارێزى لە ماڵەکانیاندا دەمێننەوە، هاوڵاتیان یادەکەیان لەبیرکردوە.