بەپەلە

سۆران؛ دوەمین كۆڕبەندی گەشتیاری بەڕێوەچوو

08:59 - 11/02/2019
کوردستان

دوەمین كۆڕبەندی گەشتیاری لە قەزای سۆران، بەڕێوەچوو ‌و ژمارەیەكی زۆر لە كۆمپانیای عێراقی بەشدارییان تێدا كرد, ئامانجی كۆنفراسەكە بۆ راكێشانی سەرنجی زیاتری گەشتیارانی ناوخۆیی ‌و بیانییە بۆ سەردانی ناوچە گەشتیارییەكانی هەرێم. بڕیارە لە مانگی شوبات و ئاداری ئەمساڵیشدا، زنجیرەیەك چالاكی تر ئەنجامبدرێن.

دەستەی گەشتوگوزاری هەرێم پلانی داناوە لەساڵی 2019 لەهەر وەرزێكدا ژمارەیەك چالاكی بۆ ڕاكێشانی گەشتیاران ئەنجام بدات.

 لەو چوارچێوەیەدا دووەمین دیداری گەشتیاری بەبەشداری 30 كۆمپانیای عێراقی ئەنجامدرا، ئەوەش دوای سێیەمین ڤیستیڤاڵی خلیسكانەی سەر بەفر دێت لەچیای كۆڕەكی گەشتیاری لە قەزای سۆران كە لەرۆژانی رابردودا بەڕێوەچوو.

بەمەبەستی زیاتر راكێشانی گەشتیاری بیانی بۆ ناو هەرێمی كوردستان، بڕیارە لەمانگی شوبات و ئاداری ئەمساڵدا زنجیرەیەك چالاكی گەشتیاری ئەنجام بدرێن.

بەپێی ئاماری دەستەی گەشتوگوزاری هەرێم لەساڵی 2018 سێ ملیۆن و 57 هەزار گەشتیار ڕوویان لەهەرێمی كوردستان كردووە، لە دوو مانگی ئەمساڵیشدا بەهۆی بارینی بەفرو دیمەنەكانی ناوچە شاخاوییەكان ژمارەیەكی زۆری گەشتیار هاتوون.

هەر بەمەبەستی بەرزكردنەوەی ئاستی هێنانی گەشتیار بۆ هەرێمی كوردستان، بەسەرپەرشتی گەشتوگوزاری گەرمیان و دەستەی گەشتوگوزاری هەرێم شاندێكی هەرێم بەشداری لەپێشانگایەكی گەشتیاری دەكات لەوڵاتی ئێران، لەشاری بەغداش شاندێكی گەشتوگوزاری هەرێم بەشداری لەپێشنگایەكی گەشتیاری دەكات.

هەر لە درێژەی چالاكیەكاندا گەشتوگوزاری سلێمانی كۆڕبەندێكی گەشتیاری بۆ ژمارەیەك كۆمپانیای عێراقی سازدەكات، لەمانگی ئازاریشدا پێشانگای نێودەوڵەتی بۆ گەشتو گوزار لەشاری هەولێر بەڕێوەدەچێت.

164 جار خوێندراوەتەوە