لە وڵاتی من خەونیش یاساغە

خەون، خۆزگە، لە لەدایكبوونمانەوە لەگەڵمان لە دایك ئەبێت، كێ هەیە شەوێك لە سەربان بەدیار ئە ستێرەكانەوە خەونێك، خۆزگەیەك نەیگەیانبێتە ئەوپەڕی جوانی؟

كێمان هەیە خەونی بە ئازادیەوە نەبینی بێت، كێمان هەیە خەونی بە گەیشتنی بە كەنارێكی هێمن نەبینی بێت.

خەونی فەرمانبەرێك وەرگرتنی موچەكەیەتی تا خوانێكی گەرموگوڕ بخاتە بەردەم مناڵەكانی.

خەونی ئەو دەرچووەی زانكۆ، دامەزراندنێتی و لە یەكەم موچەی خزمەتێك بگەیەنێتە دایە و باوەی.

خەونی پێشمەرگەیەكە كە سەربەرزانە بەو شەقامەدا بڕوات و خەمی گیرفانی نەبێت.

خەونەكان زۆرن كامیان هاتە دی!؟؟
خەیاڵ و خەون بۆتە شەرم بۆ تاكەكان، بۆ ئەو كەسانەی تا ئێستا ویژدان لایان زیندووە؟؟

خەون چۆن هیجرەت ناكات كاتێك ژیان بۆتە سەربووردەی خەم و ئازار، هەواڵی رۆژ كۆی خەونەكان وێران ئەكات، لەم ووڵاتەی مندا بێ ئومێدی بۆتە هەستی ڕۆژانەمان.

ئەمە رووخان نیە، ئەمە كاڵ بوونەوەی چەمكەكان نیە، تەنها گێڕانەوەی رووداوەكانی رۆژە!!!

ئەو گەنجە چۆن ئێوارە وەختێك دیاریەك بباتە یەكەم ژوانی خۆشەویستەكەی، كە كاری نیە و بابەی خانەنشینی چاوەڕێی موچەكەیەتی؟؟

خەون چۆن ئەمێنێت؟؟
ئەو میدیایە بۆتە مەنزڵگای ناشرینكردنی ئەو سەركردە گەنجەى كە باوەڕی بە دەرباری سوڵتان نیە و ئامۆزاكان بوونەتە میرەكانی بابانی شارم، رۆژێك عەجەم و رۆژێك ڕۆم؟؟؟

خەونی سیاسیە گەنجەكان چۆن ئەمێنێ؟؟؟
ئەو خۆپیشاندانە قوربانی ئەبێت و دوا وێستگەی تەنها ئەم ناوچەیەیە و ناڕواتە ئەوبەری ووڵات، ئیتر خەونى گۆڕان ئەبێتە پرسیار لای هەموان؟؟

خەونی گەنجەكان چی لێ دێت؟؟
ئەو بزاوتە بە كۆمەڵێك پاكێجەوە دێتە مەیدان و بانگەشەی گۆڕان لە ژیانی هەموان ئەكات و كاریزمای سەركردەیەك ئەی لاوێنێ؟؟ دوای كۆچی سەركردە و بەشداری لە دەسەڵاتدا زۆرێك لە خەونەكان كاڵ ئەبێتەوە و پرسیار دروست ئەبێت لە سەر كۆی هەنگاوەكان.

خەون وێڵ ئەبێت.. ئەو رێكخراوە سیمینارێك ئەكات لە سەر مافەكانی مرۆڤ، لە هەمان كاتدا دەنگی تەقە ئەبیسترێت و گەنجی هەژاری شارم ئەبنە قوربانی.

خەونی ئازاد بوون چی بەسەر دێت؟
هەر خەونە هەڵئەوەرێ، هەر ترسە لە رووی هەموان ئەبینرێت، هەر قەڵەمە و ئەبنە خزمەتكاری دەرباری سوڵتانە گەنجەكان، هەر سەفەرە بەرەو غەریبی ئەبێتە خەونی پرتەقاڵی...

گەر خەونەكان بنێژرێن سەراپای ووڵاتم ئەبێتە گۆڕستان، گۆڕستانی ووڵاتی من جەستەی تێدا نیە، كۆی رەنگە جیاوازەكانی خەونە.

داری ووڵاتی من وەك خەونی مرۆڤەكانی ووڵاتم  زوو بە پاییز ئەگەن، لە بەهاریشدا ئەوان بێ گەشەن! ئاوی ووڵاتی من لە هاوینیشدا ئەیبەستێت، بە بارتەقای خەونەكان بەستوویەتی!

لە وڵاتی مندا، جوانیەكان وەك خەونی مناڵیمان وایە، كەمی دێتە دی.
هەڵسانەوە بە چی ئەكرێت؟؟؟

212 جار خوێندراوەتەوە