لە كاتێكدا بێ ئومێدی، بێ هیوایی ، دەبێتە دیاردە، ئەبێتە هزری گشتی وەك ئەم ساتە وەختەی كە زۆرینەی تاكی كوردی و توێژەكانی ناو كۆمەڵگا بەو بارودۆخەدا ئەڕۆن.

لە كاتێكدا ووڵات دەبێتە خۆشەویستێكی دابراو، دەبێتە مەنزڵگای دابران بۆ تاكەكان.

لە كاتێكدا سامانی ووڵات و نیشتیمان بۆ كە مینەیەكە  و ناداد پەروەری دەبێتە مۆركی ناسراوەی سیستەمی حوكمڕانی ووڵات.

لە كاتێكدا سەرۆك پاش پیر بوونی و باڵاكردنی تەمەنی، دەبێتە مەرجەع و بڕیار و جێ گۆڕكێ بە نەوەكان لە دەسەڵاتدا دەبێتە بڕیاری گشتی نەك دەرئەنجامی هەڵبژاردن.

لە كاتێكدا بیر و هزر لە رووداوەكاندا هیجرەت دەكەن و شیكردنەوە دەبێتە تەقلیدی و رووداوەكان بە جودا لە ئایدۆلۆجیا خۆی دەریدەخات.

لە كاتێكدا رەوتی سیاسی وڵات رەوتی چەندایەتیە و ئەوەی غائیبە چۆنایەتیە، ئەو كات هزر و فكر وەك كتێبێكی تۆز لێ نیشتووی ناو كتێبخانەیەكە.

لە كاتێكدا كۆچی گەنجانی ووڵات رۆژانە دەبێتە زویر بوون لە خاك و نیشتیمان، خەونی هەندەران دەبێتە خەونی گشتی.

لە كاتێكدا بنەماڵە جێی سەركردە و كاریزمایە، لە كاتێكدا بیری نەوت و كاسبی سنور دەبێتە خەمی گشتی.

لە كاتێكدا تاك دەبێتە بارگرانی بەسەر دەسەڵات و نابێتە سەنتەری خزمەت ....

ئا لەو كاتانەدا ؟؟؟؟؟

پرسیار ئەوەیە هزر بەرەو كوێ ؟؟

بیری نوێ دەبێتە چی ؟؟

نە باوی كۆمەڵانی خەڵكی كوردستان دەمێنێ ، نە جوگرافیا رۆڵی خۆی ئەمێنێ و نە خاك پیرۆزی خۆی ئەمێنێ.

خاكی داگیر كراو كاتێك پیرۆزە كە ببێتە خەمی گشتی نەك بۆ خەڵكەكەی خەم و بۆ دەسەڵات سەرچاوەی سامانی سروشتی و تاڵان كردنی.

نە دروشم تاك دەجوڵێنێ و نە دەیخاتە گریان.

ئێستا چاوەرێی موچەیە كەی دابەش دەكرێت، چاوەڕێی كارەبای ماڵ و نرخی ئەمپێری موەلیدەیە ...

لە و كاتەدا تاك وێلە بۆ خەونەكانی، بۆ پێویستیەكانی ، یئەو کات هزری گشتی هیجرەت دەکات.

كاتێك تاك هزرەكانی پێشوو تەنها لە قەتماغەی  حیزب و بزاوتا دەبینێ و نابێتە ئومێد بۆ ژیانی بۆ خەمەكانی، رەت كردنەوە دەبێتە هزری گشتی.

تاكە رێگەیەك بۆ هێنانە دی ئومێد لای تاكی كوردی هزری تاكگەرایی دەبێت

سەرەتاكەشی دەرچوونە لە ژێر هەژموونی حیزب و سەركردە.

سەرەتای تاك ئازاد بوونییەتی، باوەر بوونە بۆ ئازادی خۆیی و بیركردنەوەی.

سەرەتای هەنگاویش پاراستنی دەنگەكەیەتی.

ئیتر كاتی ئەوە هاتووە تاك خۆی بكاتە سەنتەری بریار و ئومێد.