لەم زەمەنی وەیشومەیەدا تەنها وشەكان دێن و ئەرۆن، وشەكان تەنها وشەن و هیچی تر، ئازارەكان وەك خۆیانن؛ رۆژانە ئازاری نوێ...

زەمەنی كۆرۆنا زەمەنی ترس، زەمەنی وەیشومە، زەمەنی خەمی گشتی، زەمەنی گیرفانی بەتاڵی باوك، زەمەنی دەست و نزای دایك بۆ رۆڵەكانیان، زەمەنی وەستانی دەنگ، زەمەنی حەپەسانی هەموان.

ئەم دەردە دونیا بەرەو كوێ ئەبات، ئەو ژێر پردە كەی پڕئەبێتەوە لە ژاوەژاو، ئەو ژێر دارە كەی شار كۆ ئەكاتەوە، ئەو دوكانانە كەی بێ ترس ئەكرێنەنەوە؟

ئەم كۆرۆنایە دونیایەكی نوێ فەراهەم ئەكات و باس لە تان و پۆكەی ئەكرێت بەم شێوازە:

*سیستەمی سیاسی نوێ، سیستەمی فرە جەمسەر ئەبێت، گۆرانكاری لە سیستەمی یەك جەمسەری روو ئەدات.
*دونیا؛ دونیای نوێی تەكەنۆلۆجیا ئەبێت وە زیاتر كۆمپانیاكانی تەندروستی برەوی ئەبێت و كاری كۆمپانیاكان و دەوڵەتیش زیاتر كاری ئۆنڵاین ئەبێت و كاری گەیاندن بە شێوازی دیلەڤەری دەبێتە بازاڕی گەورەی كاركردن.
*سیستەمی سیاسی ئەكەوێتە دوای سیستەمی ئابووری، واتە زاراوەی ئابوری ئەبێتە پێناسەی ژیانی هاووڵاتیان.
*وڵاتان بەرەو داخران ئەچن، دەركەوت وڵاتە داخراوەكان كەمترین قوربانی كۆرۆنا بوون.
* ئایین زیاتر بەرەو ریتمی تاكە كەسی ئەچێت و كۆبونەوەی هاوئیمانەكان كەم ئەبێتەوە.
*زانیاری كۆكراوە لەسەر تاكەكان زیاتر ئەبێت و ئیتر دونیا، دونیای ئازادی تاكە كەس نامێنێت و دەوڵەت زانیاری لەسەر تاكەكان بە مافی خۆی ئەزانێت.

زۆر؛ تان و پۆ باس ئەكرێت لە سەر ژیانی دوای كۆرۆنا، كە زۆرینەی بابەتەكان وابەستەی جۆرێك لە هەست و لێكدانەوەی جیاوازی تاكەكانن.

لە هەرێمی كوردستان چ باسە؟

لەم قەیرانی كۆرۆنایەدا هەرێمی كوردستان، قەیرانی سیاسی، بژێوی، قەیران لەگەڵ بەغداد، قەیران لەگەڵ دەرەوەی خۆی... زۆری تر لە قەیران ئەبینرێت، هەرێمی كوردستان كێشەی موچە و بودجەى زیاد لە كاتەكانی تر پێوە دەركەوتوە، حوكمڕانی لە كوردستاندا؛ قەیران بۆتە سیفەتی ناسراوای.

لەم ستونەدا باس لە هۆكاری ئەو دۆخە ناكەم، چونكە زۆر بابەت لەسەر ئەوە وتراوە، ئەوەی جێی پرسیارە، چارەسەر چیە؟
خەڵك لە بێ ئومێدیدا ئەژی، مووچە بۆتە خەمی گەورە، خزمەتگوزاری هیجرەتی كردوە، دڵەڕاوكێ سیفەتی هەموانە، ترس بەڕوی هەموانەوە ئەبینرێت.
لەم قەیرانی بودجەیەدا ئەبێت رێگەچارە چی بێت؟

بەپێی ئەو ئامارانەى كە بڵاوئەكرێتەوە، داهاتی نەوت بۆتە نزیكەی (30) ملیۆن دۆلار، داهاتی ناوخۆ نزیكەی (60) ملیۆن دۆلار كە (نەبوونی شەفافیەت گومان لەسەر ئەم ژمارانە دروست ئەكات)، ئەو بوجەیەش کە لە بەغداوە دێت نزیكەی 400 ملیا ر دینارە، ئەمە جگە لەو هاوکاریەى کە لە ئەمەریکاوە دێت، کەواتە کە کورتهێنان لە بودجەدا بەوشێوەیەبێت، رێگەچارە چییە؟

ئەوەی تائێستا باسى لێوە ئەكرێت، تەنیا پاشەكەوت و هەندێ هەوڵە بۆ چاكسازی، كە بە داخەوە چاكسازی بۆتە زاراوەیەك كە هەمو قسەی لەسەر ئەكەن بێ ئەوەی هەنگاوی فیعلی بنرێت.
تائێستا بەرنامەیەكی ورد و درشت و پلانێكی زانستی نەخراوەتەڕوو بۆ بەڕێكردنی ئەم قەیرانە، لەگەڵ بەغدا نەتوانراوە دانوسانەكان بگەنە دەرئەنجام، دەسەڵات و حوكمڕانی تا ئێستا هەنگاوی جدی نەناوە بۆ دۆزینەوەی رێگە چارە!

لەم دۆخەدا؛ بۆ دەبێت لامەركەزێتی دارایی و كارگێری وەك جیابوونەوە سەیر بكرێت، لە عێراقدا دەستور روون و ئاشكرایە، كە رێگە ئەدات لەسەر ئاستی پارێزگایەك یان چەند پارێزگایەك هەرێمی نوێ دروست بكرێت! کەواتە بۆ دەبێت دەستبردن بۆ ئەو رێگەچارەیە وەک خیانەتێک تەماشا بکرێت؟!!

ئەم بابەتە هی ئەوەیە زۆری لەسەر باس بكرێت و ببێتە بابەتی گشتی نەك تەنها وەك ناكۆكی و ململانێی نێوان هەندێک لایەن سەیر بكرێت.

ئایا بەغداد فریادڕەسە، یاخود بارودۆخی حوكمڕانی لە عێراقدا هی ئەوەیە وەك هیوایەك سەیری بكەین؟ ئایا ژیانی هاوڵاتیان لە شارەكانی تر لە عێراقدا بەو جۆرەیە كە ئێمەی هاوڵاتی وەك خەو بیبینین؟ ئایا دەسەڵاتی كوردی بەدیلی جیاوازی پێیە بۆ دەرچوون لەم قەیرانانە؟ ئایا پاكێجدان بە حوكمڕانی كوردی زەمەنی بە سەرنەچووە؟

هەموو ئەمانە پرسیارن، كاتی ئەوە هاتووە بێ بەخشینەوەی تۆمەت بەدوای وەڵامدا وێڵبین.

میدیا جیاوازەكان حەقیەتی دەرگا بكەنەوە لەسەر ئەم بۆچوونە جیاوازانە و خەمی تاكەكان خەمی گشتی هەموومان بێت.