لە ١٧ ساڵی رابردوودا، هەتا بەستنی کۆنفرانسی کرکوک لە ١٦/٩/٢٠٢٥ بزوتنەوەی گۆڕان بەسێ سەردەم و سێ قۆناغ و سێ ڕێکخەری جیاوازدا تێپەربوە.


قۆناغی یەکەم: بەقۆناغی ( کارێزما ) و پشتیوانی بەرفراوانی خەڵک لە بزوتنەوەی گۆڕان دەناسرێتەوە و بە وەرزی بەهاری گۆڕان ناو دەبرێ کە ( ڕەوانشاد نەوشیروان مستەفا ) ڕێبەرایەتی دەکرد.



قۆناغی دووەم: بە قۆناغی بەڕێز عومەر سەید علی و کۆچی ( کارێزما ) و پاشەکشەی جەماوەری و سەرەتای گەلە کۆمەکێی نەیاران و پلانگێڕی لە ناوەوەو دەرەوەی بزوتنەوەی گۆڕان دەناسریتەوە، کە ئامانج لێی کۆتای هێنان بوو بە بزوتنەوەی گۆڕان.


قۆناغی سێ یەم: قۆناغی بەرێز دانا ئەحمەد مجیدە کە توندبونەوەی ململانیکان تا ئاستی لێکترازان و هەوڵدان بۆ هەڵوەشانەوەی گۆڕان سەری کێشا کە خۆش بەختانە بزوتنەوەی گۆڕان مایەوە و مەترسی یە یاسایی و دوستوریەکان تێ پەراند.

ئێستا ئیتر دوای تێپەراندنی هەموو ئەو بەربەست و لەمپەرە نەخوازراوانەی بۆ بزوتنەوەکە دروستکرا، دەبێ رێکخەری قۆناغی سێ یەم و سەرکردایەتی گۆڕان لەم قۆناغە نوێ یەدا بە کردەوە هەنگاو بنێن بۆ ئەوەی کە ( گۆڕان ) لە بزوتنەوەیەکی (کارێزمای ) یەوە بگوازنەوە بۆ بزوتنەوەیەکی ( دامەزراوەیی ) حەقیقی و راستەقینە کە حەماسەت و هەڵچونی کەف و کوڵی کاتی بگۆڕێ بۆ پرۆژە و ململانێ بگۆڕێ بۆ بەسیستم کردن و یادەوەریەکانی رابردوو بگۆڕێ بۆ ستراتیژی کارکردن و چالاکی بێ پلان بگۆرێ بۆ چالاکی بە بەرنامە و ڕێکخراو-- هتد بۆیە ئەرکی ئەم قۆناغەی رێکخەری نوێ تەواو جیاوازە لە ئەرکی دوو قۆناغەکەی پێشوو کە ئەوەندەی هەردوو رێکخەر سەرقاڵ بوون بەوەی کە کێ بۆ فڵان پۆست بێ و کێ کاندیدی پەرلەمان و کێ سەرۆکی تیمی حوکمەت و کێ سەرۆکی فراکسیۆنی گۆڕان بێت، بۆ ئەوانەی درۆیان لەگەڵ پەیام و بەرنامەکانی گۆڕان کرد، ئەوانەی کە دەستیان گەیشت بە پۆست و ئیمتیازات و موچەی پلە باڵا و دواجار بەبیانوی جۆراو جۆراو گۆرانیان بەجێ هیشت و خەڵکیان لە بزوتنەوەی گۆڕان نائومید کرد.

ئێستا ئیتر دوای ئەو ئەزمونە تاڵ و هەموو ئەو هەڵە سیاسی و رێکخراوەیی یانەی کە بەسەر گۆران هات و تێ پەری، پرسیارە گرنگ و سەرەکی یەکە ئەوەیە کە قۆناغی سێ یەم و ڕێکخەری گشتی نوێ چۆن گۆران بەرێوە دەبات، ئایا ئەویش گۆڕان وەک رابردوو بەرێوە دەبات، یان بە پێچەوانەوە بە بڕیاری بەکۆمەڵ و بە پرس و ڕاوێژ لەگەڵ دەستەبژێری ئاقڵ مەند و بەهەوڵی دەستە جەمعی گۆڕان چالاک دەکاتەوە و ئەم قۆناغە دەکاتە قۆناغی زێرینی رێکخستنەوە و گواستنەوەی گۆڕان لە قۆناغی ( کارێزما ) وە بۆ سەردەمی سەرکردایەتی بە کۆمەڵ و بەسیستم کردن و بە دامەزراوەیی کردن کە سەرلەنوێ متمانەی خەڵک بۆ گۆڕان دەگەڕێنیتەوە؟