ئاراس جەبار، شارەزای کەشناسی ڕایدەگەیەنێت؛ کاریگەریی ئەو شەپۆلە بارانبارینەی ڕووی لە ناوچەکانی هەرێمی کوردستان کردووە، تا درەنگانی ئەمشەو بەشێوەی پچڕپچڕ بەردەوام دەبێت و پێشبینیش دەکرێت لە بەشێک لە ناوچە شاخاوییەکان بەفر ببارێت.

بەپێی پێشبینییەکانی ئەو شارەزایەی کەشناسی، لە ئێوارەی ئەمڕۆوە بارستە هەوایەکی سارد و وشک لە باکوورەوە هەرێمی کوردستان دەگرێتەوە. لەگەڵ کۆتاییهاتنی شەپۆلی بارانبارینەکەش، ئەگەر هەیە ئەمشەو بەفرێکی کەم لە سەنتەری حاجی ئۆمەران و ئەو ناوچە شاخاوییانە ببارێت کە بەرزییان لە سەرووی 1600 مەترەوەیە لە ئاستی ڕووی دەریا.

سەبارەت بە کەشوهەوای سبەینێ دووشەممە (9ی تشرینی دووەمی 2026)، پێشبینی دەکرێت ئاسمان ساماڵ بێت و کەشوهەوا جێگیر ببێتەوە، بەڵام بەهۆی کاریگەریی بارستە هەوا ساردەکەوە پلەکانی گەرما بەراورد بە ئەمڕۆ 3 بۆ4 پلە نزم دەبنەوە و لە کاتەکانی شەودا لە ناوچە شاخاوییەکان بۆ سفری سیلیزی دادەبەزن.

ئەو کەشە سارد و جێگیرە تا ڕۆژی هەینی (13ی مانگ) بەردەوام دەبێت. لە سەرەتای هەفتەی داهاتووشەوە (14ی مانگ) هەرێمی کوردستان دەکەوێتە ژێر کاریگەریی بەرزەپاڵەپەستۆیەکەوە کە پلەکانی گەرما کەمێک بەرز دەکاتەوە و تا 20ی مانگ کەشوهەوا جێگیر دەبێت، دوای ئەو ڕێکەوتەش ئەگەری دەستپێکردنەوەی شەپۆلێکی نوێی بارانبارین هەیە.