شارەزایەکی کەشناسی هۆشداریی دەدات لە بەردەوامیی شەپۆلێکی بەهێزی بارانبارین و دروستبوونی لافاو لە بەشێک لە ناوچەکانی هەرێمی کوردستان. پێشبینیش دەکرێت لە ئێوارەی سبەینێوە شەپۆلێکی سەرما ناوچەکان بگرێتەوە و یەکەمین بەفری ئەمساڵ ببارێت.

ئاراس جەبار، شارەزای کەشناسی ڕایگەیاند، ئەمڕۆ شەممە، هەرێمی کوردستان دەکەوێتە چەقی شەپۆلەکەوە. لە دوای نیوەڕۆوە بۆ شەو، کاریگەرییەکانی لە ئیدارەکانی گەرمیان، ڕاپەڕین، سۆران و پارێزگاکانی سلێمانی و هەڵەبجە زۆر بەهێز دەبێت، کە مەترسیی دروستبوونی لافاوی گەورەی لێدەکرێت بەتایبەت لە سلێمانی، هەڵەبجە و گەرمیان.

ئاماژەی بەوەشکردووە، بەیانیی سبەینێ یەکشەممە کاریگەریی شەپۆلەکە لاواز دەبێت، بەڵام لە ئێوارەدا بارستە هەوایەکی ساردی جەمسەری لە تورکیاوە هەرێم دەگرێتەوە. بەمەش کەشی زستانە دەستپێدەکات و پێشبینیی بارینی یەکەمین بەفری ئەمساڵ لە حاجی ئۆمەران و ناوچە شاخاوییەکانی سەرووی (1600) مەتر دەکرێت.

ئەو شارەزایەی کەشناسی دەڵێت، بەرەبەیانی ڕۆژی دووشەممە کاریگەریی شەپۆلەکە بەتەواوی کۆتایی دێت و کەشوهەوا جێگیر دەبێتەوە، بەڵام بەهۆی بەردەوامیی بارستە هەوا ساردەکەوە، لە شەواندا پلەکانی گەرما لە ناوچە شاخاوییەکان بۆ سفر پلەی سیلیزی دادەبەزن.