پرۆسەی دەنگدان بۆ هەڵبژاردنی گشتی لە ئیسرائیل دەستیپێکرد، کە یەکەمین هەڵبژاردنە لە دوای هێرشەکانی حەوتی ئۆکتۆبەری ساڵی ڕابردووەوە بەڕێوەدەچێت. ململانێیەکی توند لە نێوان بنیامین ناتانیاهۆ، سەرۆکوەزیرانی ئێستا و گادی ئایزنکۆت، سوپاسالاری پێشوو لە ئارادایە.

نزیکەی 7.3 ملیۆن هاووڵاتیی مافی دەنگدانیان هەیە بۆ دیاریکردنی 120 ئەندامەکەی کنێست. ڕاپرسییەکان دەریدەخەن ڕکابەرییەکی زۆر نزیک لە نێوان هەردوو بەرە سەرەکییەکەدا هەیە و پێناچێت هیچ لایەنیان بتوانن زۆرینەی پێویست بۆ پێکهێنانی حکومەت (61 کورسی) بەتەنیا مسۆگەر بکەن.

ناتانیاهۆ ڕووبەڕووی ڕەخنەی توند بووەتەوە بەهۆی شکستی لە ڕێگریکردن لە هێرشەکانی حەوتی ئۆکتۆبەر و لێکەوتەکانی شەڕی غەززە و لوبنان. لە بەرامبەردا، ئایزنکۆت خۆی وەک جێگرەوەیەک دەخاتەڕوو و بەڵێنی یەکخستنەوەی کۆمەڵگە و کۆتاییهێنان بە بەخشرانی جولەکە ئۆرتۆدۆکسەکان لە خزمەتی سەربازی دەدات.

لە هەڵبژاردنەکەدا چەندین هاوپەیمانیی جیاواز لە ڕاستڕەو، چەپ و میانڕەوەکان بەشدارن. هاوکات، پارتە عەرەبییەکانیش ڕۆڵێکی گرنگیان دەبێت لە دیاریکردنی هاوکێشەی پێکهێنانی حکومەتی داهاتوودا، بەتایبەت لەکاتێکدا کە هیچ کام لە بەرەکان زۆرینەیان نییە و پێویستیان بە هاوپەیمانێتییە.