ئەمڕۆ چوارشەممە شەپۆلێکی ناجێگیری کەشوهەوا کە هەورەبرووسکەی بەهێز و بارانی کەم بۆ مامناوەندی لەگەڵدایە، چەند ناوچەیەکی هەرێمی کوردستان و کەرکوک دەگرێتەوە و لە کاتەکانی ئێوارە و شەودا کاریگەرییەکەی چڕتر دەبێتەوە.

ئاراس جەبار، شارەزای کەشناسی ڕایگەیاند، لە کاتەکانی دوای نیوەڕۆی ئەمڕۆوە لەسەر سنووری سلێمانی، هەڵەبجە و باکووری گەرمیان ئەگەری دروستبوونی هەورەبرووسکە و بارینی بارانێکی کەم هەیە. لە کاتەکانی ئێوارە و شەودا ناجێگیرییەکە لە سنووری کەرکوک، سلێمانی، هەڵەبجە و باکووری گەرمیان زیاتر دەبێت و هەورەبرووسکەی بەهێز و چڕ دروست دەبێت.

ئەو شارەزایەی کەشناسی ئاماژەی بەوەش کرد، بەگشتی بڕی بارانەکە زۆر نابێت و بەپێی کات و شوێن لەنێوان کەم بۆ مامناوەند دەبێت، بەڵام برووسکەکان بەهێز و توند دەبن. هاوکات لە ناوچەکانی سنووری هەولێر، سۆران و ڕاپەڕین ئەگەری دروستبوونی هەورەبرووسکە و بارینی تاوەبارانی لاواز هەیە.