سکرتێری ئەنجومەنی وەزیرانی هەرێمی کوردستان ئاشکرای دەکات، لە ماوەی دوو ساڵدا و بەپێی ئامارەکانی وەزارەتی پلاندانانی عێراق، ژمارەی دانیشتووانی هەرێم لەبری زیادبوون، نزیکەی (79) هەزار کەس کەمیکردووە.

ئامانج ڕەحیم، سکرتێری ئەنجومەنی وەزیران ڕایدەگەیەنێت؛ لە ساڵی (2022) و بەپێی نووسراوێکی فەرمیی د. خالید بەتاڵ، وەزیری پێشووی پلاندانانی عێراق، ژمارەی دانیشتووانی هەرێمی کوردستان زیاتر لە پێنج ملیۆن و (884) هەزار کەس بووە کە دەکاتە (14٪)ی کۆی دانیشتووانی عێراق.

ئاماژەی بەوەشکردووە، لە ساڵی (2024)دا دوای ڕێکارەکانی وەزارەتی پلاندانانی فیدراڵی، ئەو ژمارەیە بۆ پێنج ملیۆن و (805) هەزار کەس دابەزیوە، بەمەش ڕێژەی دانیشتووانی هەرێم بۆ (12.7٪) کەمبووەتەوە.

سکرتێری ئەنجومەنی وەزیران جەخت دەکاتەوە کە لەبری زیادبوونی سروشتی، ئەم کەمبوونەوەیە پرسیارێکی جددیی زانستی و لۆجیکی دروست دەکات. پێشی وایە ئەمە ئەنجامی گۆڕانی ڕاستەقینەی ژمارەی دانیشتووان نییە، بەڵکو گۆڕینی نائاسایی پێوەرەکانی هەژمارکردنە و پێویستی بە ڕوونکردنەوەی فەرمی و بەڵگەدار هەیە.