وەزیری دارایی و ئابووریی حکومەتی هەرێمی کوردستان ڕایدەگەیەنێت، دەیانەوێت حکومەتی فیدراڵ مامەڵەی هاوشێوەی مووچەخۆرانی عێراق لەگەڵ مووچەخۆرانی هەرێم بکات و مووچە لە خەرجیی کرداری دەربهێنرێت، هاوکات داوا لە بەریتانیا و وڵاتانی هاوپەیمان دەکات پشتیوان بن بۆ چەسپاندنی مافەکانی هەرێم لە پڕۆژەیاسای بودجەی 2027ـدا.

ڕۆژی سێشەممە (15ی ئەیلولی 2026)، ئاوات شێخ جەناب، وەزیری دارایی و ئابووری، پێشوازی لە هۆڵی ڤێر، کونسوڵی گشتیی بەریتانیا لە هەرێمی کوردستان و شاندێکی یاوەری کرد. لە دیدارەکەدا گفتوگۆ لەبارەی دوایین بەرەوپێشچوونەکانی ڕەشنووسی پڕۆژەیاسای بودجەی ساڵی 2027ـی عێراق و جێگیرکردنی پشکی هەرێم کرا. وەزیری دارایی ڕایگەیاند، ماوەی چەند مانگێکە سەرقاڵی ئامادەکارین بۆ دیاریکردنی شایستە داراییەکانی هەرێم لەسەر بنەمای دەستوور و بەپێی دوایین داتاکانی سەرژمێریی گشتیی دانیشتووان، و زامنکردنی مووچەش لە پێشینەی کارەکانیانە.

سەبارەت بە کێشەی دەروازە سنوورییەکان، وەزیری دارایی ئاماژەی بەوە کرد کە لەسەر جێبەجێکردنی سیستەمی ئەسیکۆدا گەیشتوونەتە ڕێککەوتن و چاوەڕێ دەکەن بەغدا بیخاتە بواری جێبەجێکردنەوە. ڕوونیشیکردەوە کە بە جێبەجێکردنی ئەو سیستەمە، سەرجەم ئاستەنگەکانی بەردەم بازرگانانی هەرێم هەڵدەگیرێن، کە خۆیان لە لابردنی بازگەکان، پێدانی دۆلار بە نرخی فەرمیی بانکی ناوەندی و چارەسەرکردنی کێشەی باج دەبیننەوە. لە بەشێکی دیکەی دیدارەکەدا، باس لە هەماهەنگیی نێوان هەردوو وەزارەتی دارایی کرا بۆ بنەبڕکردنی بیانووەکانی ڕابردوو لەسەر لیستی مووچە، داهاتی ناوخۆ و وردبینیی خەرجییەکان.

لای خۆیەوە، کونسوڵی گشتیی بەریتانیا ستایشی شەفافیەتی وەزیری دارایی کرد لە خستنەڕووی داتا و زانیارییەکان، و بە پێویستی زانی کە سەرجەم لایەنە کوردییەکان بۆ جێگیرکردنی شایستە داراییەکانی هەرێم یەکدەنگ بن. لە کۆتاییدا وەزیری دارایی جەختی لە گرنگیی یەکڕیزیی کورد کردەوە و داوای لە کونسوڵی بەریتانیا کرد لەرێگەی وڵاتانی هاوپەیمانەوە پشتیوانیی مافەکانی هەرێمی کوردستان بکەن.