سەرچاوەیەکی ئاگادار، ئەمڕۆ پێنجشەممە، ڕاگرتنی پێدانی قەرز و پێشینەکانی بە هەموو جۆرەکانییەوە لە زۆربەی بانكە حکومییەکاندا ئاشکرا کرد، هۆکاری ئەمەش بۆ کەمیی تەرخانکراوە داراییەکان و نەبوونی نەختینەی پێویست لەو بانکانەدا دەگەڕێتەوە.

سەرچاوەکە بە شەفەق نیوزی ڕاگەیاندووە، کەمبوونەوەی قەبارەی پارەی دانراو (سپاردەکان) و دابەزینی ئاستی نەختینە، کاریگەریی ڕاستەوخۆی کردووەتە سەر توانای بانکە حکومییەکان لە پێدانی قەرز و پێشینەکان، هەروەها قەرزە وەبەرهێنانەکانیش دەگرێتەوە کە بۆ پارەدارکردنی پڕۆژە و کۆمەڵگە نیشتەجێبوونەکان لە بەغدا و پارێزگاکان تەرخان کراون.

ئاماژەی بەوەش کردووە، کەمبوونەوەی نەختینەی بانکی بووەتە هۆی سنووردارکردنی توانای بانکەکان لە بەردەوامبوون لە پارەدارکردنی چالاکییە جیاوازەکانی قەرز و وەبەرهێنان، ئەمەش پێدەچێت ڕەنگدانەوەی نەرێنی هەبێت لەسەر جووڵەی پارەدارکردن و پاڵپشتیکردنی پڕۆژە نیشتەجێبوون و گەشەپێدانەکان لە وڵاتدا.