عەلی فالح زەیدی، سەرۆک وەزیرانی عێراق، ئەمڕۆ سێشەممە لە چوارچێوەی سەردانە فەرمییەکەیدا بۆ بەرلین، لەگەڵ فرانك ڤاڵتەر شتاینمایەر، سەرۆکی کۆماری ئەڵمانیای فیدراڵ کۆبووەوە و پرسی پەرەپێدانی پەیوەندییەکانی نێوان هەردوو وڵات و فراوانکردنی دەرفەتی بەشداریکردنی کۆمپانیا ئەڵمانییەکانی لە پڕۆژەکانی عێراقدا تاوتوێ کرد.

لە کۆبوونەوەکەدا، هەڵسەنگاندن بۆ بەرەوپێشچوونی پەیوەندییەکانی عێراق و ئەڵمانیا و هەوڵە هاوبەشەکان بۆ بەهێزکردنی هاوبەشیی ئابووریی نێوان هەردوو وڵات کرا. هەروەها جەخت لە فراوانکردنی دەرفەتی بەشداریکردنی کۆمپانیا ئەڵمانییەکان لە هەنگاو و پڕۆژە گەشەپێدانەکانی ئێستای عێراق کرایەوە.

لە میانی دیدارەکەدا، سەرۆک وەزیرانی عێراق دووپاتیکردەوە، حکومەتەکەی بەردەوامە لە کرانەوەی ئابووری بەڕووی ئەڵمانیا و سەرجەم وڵاتانی یەکێتیی ئەوروپادا، ئەوەش لە سایەی ئەو هەنگاوانەی نراون بۆ زیادکردنی بەرهەمهێنان و هەناردەکردنی نەوتی خاو و بەرزکردنەوەی ئاستی بەرهەمهێنانی کارەبا، شانبەشانی خێراکردنی پرۆسەی گۆڕینی عێراق بۆ ڕێڕەوێکی ئابووریی کارا لە نێوان بازاڕەکانی ئاسیا و ئەوروپادا لە ڕێگەی پڕۆژەی (ڕێگەی گەشەپێدان)ـەوە.

لە بەشێکی دیکەی دیدارەکەدا، عەلی فالح زەیدی پێداگریی و تەرخانکردنی هەوڵەکانی عێراقی بۆ پاڵپشتیکردنی سەقامگیریی ناوچەکە و کەمکردنەوەی گرژییەکان دووپات کردەوە، ئەوەش بە ئامانجی ڕەخساندنی دەرفەتی زیاتر بۆ هاوبەشیی ئابووریی هەرێمی و نێودەوڵەتی، و دروستکردنی تەواوکاری لە پڕۆژەکانی گەشەپێداندا کە خزمەت بە بەرژەوەندییەکانی گەلی عێراق و گەلانی دۆست، لە نێویاندا گەلی ئەڵمانیا، دەکات.