بەڕێوەبەرایەتیی گشتیی کار و دەستەبەری کۆمەڵایەتی بڕیاریدا بە قەدەغەکردنی بڵاوکردنەوەی وێنە و ڤیدیۆی کرێکارانی بیانیی خزمەتگوزاریی ماڵان لە تۆڕە کۆمەڵایەتییەکاندا، هۆشداریش دەداتە سەرپێچیکاران کە ڕووبەڕووی ڕێکاری یاسایی توند دەبنەوە.

بەپێی نووسراوێکی بەڕێوەبەرایەتییەکە ئامانج لەم بڕیارە ڕێگریکردنە لە بەکارهێنانی وێنە و ڤیدیۆی کرێکاران بەبێ ڕەزامەندیی خۆیان بۆ مەبەستی ڕیکلام، ناوبانگپەیداکردن، یان مامەڵەی بازرگانیی ئەلیکترۆنی، بە جۆرێک کە کەرامەت و تایبەتمەندییان پێشێل نەکرێت و نەبنە کەرەستەی گاڵتەجاڕی یان بەرنامەکانی تۆڕە کۆمەڵایەتییەکان.

ڕاگەیەندراوەکە جەخت لەوە دەکاتەوە کە پاراستنی مافی کرێکار تەنها بە پێدانی کرێ و دابینکردنی هەلی کار کۆتایی نایەت، بەڵکو پاراستنی شکۆ و تایبەتمەندیی کەسییان مافێکی بنەڕەتییە. بەڕێوەبەرایەتییەکە ڕوونیکردووەتەوە کە کرێکارانی بیانیش هەمان ئەو مافە مرۆیی و کرێکارییانەیان هەیە کە بۆ هەموو کرێکارێکی دیکە ڕەچاو دەکرێت، و جیاوازیی نەتەوە و زمان نابێتە هۆی پێشێلکردنی ئەو مافانە.

لە کۆتایی بڕیارەکەدا هاتووە کە نابێت لە دەرەوەی گرێبەستی کار، کرێکار ناچار بە هیچ کار و بابەتێکی دیکە بکرێت. هاوکات لایەنە پەیوەندیدارەکان ڕاسپێردراون بۆ گرتنەبەری ڕێوشوێنی یاسایی پێویست بەرامبەر بەو کەسانەی سەرپێچیی ئەم ڕێنماییانە دەکەن.