شاندێکی باڵای حکومەتی هەرێمی کوردستان، ئەمڕۆ سێشەممە، گەیشتە شاری بەغدا بەمەبەستی ئەنجامدانی زنجیرەیەک کۆبوونەوە لەگەڵ وەزارەتە پەیوەندیدارەکانی حکومەتی فیدراڵ و بەشداریکردنی ڕاستەوخۆ لە ئامادەکردنی ڕەشنووسی پڕۆژەیاسای بودجەی گشتیی ساڵی (2027).

فەرمانگەی میدیا و زانیاری بڵاویکردەوە، شاندەکەی هەرێم پێکهاتووە لە وەزیرانی دارایی و ئابووری، سامانە سروشتییەکان، سەرۆکی دیوانی ئەنجومەنی وەزیران، سکرتێری ئەنجومەنی وەزیران، سەرۆکی فەرمانگەی هەماهەنگی و بەدواداچوون و بریکاری وەزارەتی پلاندانان. بڕیارە شاندەکە سەرەتا لەگەڵ وەزارەتی دارایی فیدراڵ و دواتریش لەگەڵ وەزارەتەکانی پلاندانان و نەوت کۆببنەوە.

ئامانجی سەرەکیی سەردانەکە، جێگیرکردنی پشک و شایستە دەستووری و داراییەکانی هەرێمی کوردستانە لە پڕۆژەیاسای بودجەی ساڵی داهاتوودا. هەر لە چوارچێوەی کۆبوونەوەکاندا، شاندەکە تێڕوانین و داواکارییەکانی هەرێم سەبارەت بە تەرخانکراوی مووچە، پلە و میلاکی وەزیفی، پڕۆژەکانی وەبەرهێنان، پەرەپێدانی پارێزگاکان، تەرخانکراوی بودجەی بەکاربردن و دۆسیەی نەوت دەخاتەڕوو، ئەوەش بە مەبەستی گەیشتن بە تێگەیشتن و ڕێککەوتنێکی هاوبەش لەگەڵ حکومەتی فیدراڵ.