بزوتنەوەی گۆڕان پرسەنامەیەک بۆ کۆچی دوایی شێخ جەمال شێخ جەلال، کەسایەتی و هەڵسوڕاوی دیاری بزوتنەوەکە بڵاودەکاتەوە و ڕایدەگەیەنێت، خەباتێکی زۆری بۆ گۆڕانکاریی سیاسی و چاکسازی لە هەرێمی کوردستان کردووە.

لە پرسەنامەکەدا کە ئەمڕۆ بڵاوکراوەتەوە، بزوتنەوەی گۆڕان ئاماژەی بەوە کردووە کە شێخ جەمال یەکێک بووە لە کەسایەتییە نیشتمانپەروەر و چاکەخوازەکان. هەروەها جەخت لەوە کراوەتەوە کە ناوبراو جگە لە هەڵوێستی بەرزی لە کایەی گشتیدا، بەردەوام ئامادەیی و پشتیوانی بۆ کۆڕ و چالاکییە ڕۆشنبیری و ڕووناکبیرییەکان هەبووە.

لە کۆتایی پەیامەکەیدا، بزوتنەوەی گۆڕان پرسە و سەرەخۆشی و هاوخەمیی خۆی ئاراستەی خێزان، بنەماڵە و هاوڕێیانی خوالێخۆشبوو کردووە و هیوای سەبووری و ئارامی بۆ هەموولایەک خواستووە.