شارەزایەکی کەشناسی پێشبینییەکانی کەشوهەوای بۆ مانگی ئابی ئەمساڵ بڵاوکردەوە و ڕایدەگەیەنێت، پلەکانی گەرما بەراورد بە مانگی تەمموز بەرزتر دەبن و ئەگەری هاتنی شەپۆلی گەرمای بەتین هەیە، بەڵام بەراورد بە ساڵانی ڕابردوو پلەکانی گەرما لە هەرێمی کوردستان نزیک لە ئاسایی دەبن.

ئاراس جەبار، شارەزای کەشناسی، لە بڵاوکراوەیەکدا ڕوونیکردووەتەوە؛ بەپێی نەخشە و پێشبینییە مانگانەکانی دەزگای ئەوروپی بۆ کەشوهەوا، زۆربەی ساڵەکان مانگی ئاب لە هەرێمی کوردستان و عێراق گەرمتر بووە لە مانگی تەمموز و بۆ ئەمساڵیش بە هەمان شێوە دەبێت. ئاماژەی بەوەشکردووە، سەرەڕای ئەگەری شەپۆلی گەرما، بەڵام تێکڕای پلەکانی گەرمی بۆ مانگی ئابی ئەمساڵ لە هەرێمی کوردستان باشتر دەبێت و لە ئاستی نۆرماڵدا دەمێنێتەوە.

لە بەشێکی دیکەی پێشبینییەکانیدا، ئەو شارەزایەی کەشناسی تیشکی خستووەتە سەر دیاردەی "ئێڵ نینۆ" و ئاشکرایکردووە، دیاردەکە تا دێت بەهێزتر دەبێت و لە وەرزی پایزی ئەمساڵدا گۆڕانکارییەکی بەرچاو لە کەشوهەوای ناوچەکە و جیهان دروست دەکات، هاوکات پێشبینی دەکات کاریگەرییەکانی بۆ هەرێمی کوردستان ئەرێنی بن و ببێتە هۆی هاتنی پایزێکی پڕ باران.