زەبیحوڵڵا خودائیان، سەرۆکی ڕێکخراوی پشکنینی گشتیی ئێران، ڕایگەیاند؛ نێوەندگیرێکی دارایی کە بە "تراستی" ناسراوە، دوای بردن و دزینی 200 ملیۆن دۆلار لە داهاتی نەوتی ئەو وڵاتە، بەرەو دەرەوەی وڵات هەڵاتووە.

سەرۆکی ڕێکخراوەکە لە چاوپێکەوتنێکی تەلەفزیۆنیدا ئاماژەی بەوە کرد، ئەو کەسە "خیانەتی لە ئەمانەت کردووە" و ئەو بڕە پارە زۆرەی نەگەڕاندووەتەوە بۆ خەزێنەی دەوڵەت. تا ئێستاش دەسەڵاتدارانی تاران ناوی نێوەندگیرەکە، کۆمپانیاکەی، یان ئەو وڵاتەی بۆی هەڵاتووە، ئاشکرا نەکردووە.

کۆماری ئیسلامیی ئێران، بۆ دەربازبوون لە سزاکانی ئەمریکا و گواستنەوەی داهاتی نەوتە قاچاخکراوەکانی، پشت بە تۆڕێکی دارایی و کۆمپانیا سێبەرەکان دەبەستێت. بەپێی زانیارییەکانیش، ئەمە تەنها حاڵەت نییە، بەڵکو تاران بەدوای لانیکەم 15 نێوەندگیری دارایی دیکەدا دەگەڕێت کە بە سەدان ملیۆن دۆلارەوە هەڵاتوون و دیار نەماون.

لەسەر ئەم کەیسانە، دەسەڵاتی دادوەریی ئێران 59 دۆسیەی دژی بەڕێوەبەرانی ئەو کۆمپانیا سێبەرانە کردووەتەوە و لە ڕێگەی پۆلیسی نێودەوڵەتی (ئینتەرپۆل)ەوە هەوڵی دەستگیرکردنیان دەدات. ئاشکرابوونی ئەم ڕووداوانەش، ڕەخنەی توندی ناوخۆیی بەدوای خۆیدا هێناوە لە نەبوونی چاودێری و شەفافیەت لە پێسپاردنی ملیاران دۆلاری وڵات بە کەسانێک تەنها لەسەر بنەمای "متمانەی کەسی".