سەرۆکی دادگای پارێزگای سنە ڕایگەیاند، دوای ئەوەی لە گەڕەکێکی شاری سنە سەگی بێلانە هێرشیان کردە سەر منداڵێکی تەمەن سێ ساڵان و بووە هۆی گیانلەدەستدانی، دەستبەجێ دۆسیەی لێکۆڵینەوە بۆ ڕووداوەکە کراوەتەوە و دوو بەڕێوەبەری شارەوانیی شارەکەش دەستبەسەر کران.

سەرۆکی دادگای پارێزگای سنە لە لێدوانێکدا ئاماژەی بەوە کرد، ڕووداوەکە لە گەڕەکی "کەڵەکەجار"ی شاری سنە ڕوویداوە و بەهۆی ئەو ڕووداوە دڵتەزێنەشەوە، سکاڵا لە دژی هۆکاران و ئەو بەرپرسانە تۆمارکراوە کە کەمتەرخەم بوون. ڕوونیشیکردەوە کە هەریەک لە جێگری بەڕێوەبەرایەتیی سیمای شار و بەڕێوەبەری پاشماوەکانی شارەوانی سنە بە بڕیاری دادوەر ڕەوانەی زیندان کراون.

لە بەشێکی دیکەی لێدوانەکەیدا، سەرۆکی دادگای پارێزگای سنە جەختی لەوە کردەوە کە لەگەڵ تەواوبوونی لێکۆڵینەوەکان، هەر کەس و لایەنێکی دیکە کەمتەرخەم بووبێت لەم ڕووداوەدا دەستنیشان دەکرێت و بە توندی و بەپێی یاسا ڕووبەڕووی لێپرسینەوە دەکرێتەوە و ئەنجامەکەشی بۆ ڕایگشتی بڵاودەکرێتەوە.