مەزهەر محەمەد ساڵح، ڕاوێژکاری سەرۆک وەزیرانی عێراق، ئەمڕۆ شەممە ڕایگەیاند، واژۆکردنی 48 ڕێککەوتن و لێکتێگەیشتن لەگەڵ واشنتن هەنگاوێکی گرنگە بۆ کرانەوەی ئابووری، و ئاماژەی بەوەشکرد کە ئەم لێکتێگەیشتنانە خواست و ئاراستەی عێراق بۆ ڕاکێشانی وەبەرهێنانی بیانی نیشان دەدەن.

لە لێدوانێکدا بۆ ئاژانسی فەرمیی هەواڵی عێراقی، مەزهەر محەمەد ساڵح وتی: "واژۆکردنی 48 ڕێککەوتن و یاداشتی لێکتێگەیشتن و ڕاگەیاندنی هاوبەشی لەنێوان عێراق و ئەمریکا هەنگاوێکی گرنگە لە ڕێڕەوی کرانەوەی ئابووری و بەهێزکردنی پەیوەندییەکانی وەبەرهێنان، بەڵام کاریگەریی ڕاستەقینەی ئەم ڕێککەوتنانە پشتدەبەستێت بە ئاستی گۆڕینیان لە بەڵگەنامەی لێکتێگەیشتنەوە بۆ پڕۆژەی کرداریی و جێبەجێکراو."

ئاماژەی بەوەشکرد، ئەم یاداشتانە پەیامێکی ئەرێنی دەدەنە وەبەرهێنەران و بازاڕەکانی جیهان کە ژینگەی وەبەرهێنانی عێراق بەرەو سەقامگیری و کرانەوەی زیاتر هەنگاو دەنێت. ڕوونیشیکردەوە، هاتنە ناوەوەی کۆمپانیا نێودەوڵەتییەکان بۆ بازاڕی عێراق بەشدار دەبێت لە گواستنەوەی تەکنەلۆجیا و شارەزایی، ڕەخساندنی هەلی کار، و کەمکردنەوەی پشتبەستن بە داهاتی نەوت لەڕێگەی وەبەرهێنان لە کەرتەکانی وزە، پیشەسازی، ژێرخان، و پەیوەندییەکان.

ڕاوێژکارەکەی سەرۆک وەزیران جەختی لەوەش کردەوە، متمانەی نێودەوڵەتی جێگیر نابێت ئەگەر چاکسازی ڕاستەقینە لە ژینگەی وەبەرهێناندا نەکرێت، کە خۆی لە ئاسانکاری کارگێڕی، شەفافیەت، پاراستنی وەبەرهێنەران، و دابینکردنی سەقامگیریی یاسایی و ئەمنیدا دەبینێتەوە.

لە بەشێکی تری قسەکانیدا تیشکی خستە سەر پرسی هاوبەشی نێوان کەرتی گشتی و تایبەت و پێیوابوو کە ئەمە ئاراستەیەکی ئابووریی مۆدێرنە. کەرتی گشتی خاوەنی زەوی، ژێرخان و یاسایە، کەرتی تایبەتیش خاوەنی توانای دارایی، شارەزایی کارگێڕی و تەکنەلۆجیایە، بە یەکگرتنیان دەتوانرێت پڕۆژەی گەورە لە بوارەکانی کارەبا، نیشتەجێبوون و گواستنەوەدا ئەنجام بدرێت، ئەمەش دەبێتە هۆی کەمکردنەوەی بارگرانی دارایی لەسەر شان و بەرۆکی دەوڵەت و زیادکردنی داهاتە نانەوتییەکان.