وەزارەتی دارایی و ئابووریی حکومەتی هەرێمی کوردستان ئاشکرای کرد، لە ماوەی حەوت ساڵی ڕابردوودا حکومەتی فیدراڵیی عێراق تەنها 42٪ی پشکی هەرێمی لە بودجەی گشتیی وڵاتدا ناردووە و زیاتر لە 48 ترلیۆن دیناری لەو پشکە بڕیوە.

بەپێی ئەو داتایانەی لە پەرتووکی کار و چالاکی و چاکسازییەکانی وەزارەتی دارایی بۆ ساڵانی (2019 تا 2025) بە خشتە و زانیاریی وردەوە بڵاوکراونەتەوە، لە کۆی زیاتر لە 79 ترلیۆن دینار کە پشکی هەرێمی کوردستان بووە دوای دەرکردنی خەرجییە سیادی و حاکیمەکان، بەغدا تەنها 33 ترلیۆن دیناری وەک مووچەی فەرمانبەران ڕەوانە کردووە.

زانیارییەکان ئەوەش دەردەخەن کە جگە لەو بڕینە گەورەیەی لە پشکی هەرێم کراوە و نەدراوە، حکومەتی فیدراڵ هیچ بڕە پارەیەکی بۆ خەرجییەکانی بەکارخستن و وەبەرهێنان لە هەرێمی کوردستان نەناردووە. هەروەها لە ساڵانی پێشووتریشدا، بەشێکی زۆری ئەو پشکانەی نێردراون، بە شێوەی قەرز لەسەر حکومەتی هەرێم هەژمار کراون.