وەزیری دارایی عێراق گشت وەزارەت، پارێزگا و دەستەکان ڕادەسپێرێت بۆ پێدانی سەرمووچە و پلەبەرزکردنەوەی فەرمانبەران و تەواوکردنی ڕێکارە کارگێڕی و داراییەکانیان، بڕیاریشدەدات بە بەدەرکردنی چەند پرسێک لە گشتاندنێکی پێشووی وەزارەتەکەی بۆ ئەوەی مافی مووچەخۆران نەفەوتێت.

فالح ساری، وەزیری دارایی عێراق، ئەمڕۆ یەکشەممە (21ی حوزەیرانی 2026)، گشت وەزارەتەکان، دەستە نەبەستراوەکان بە وەزارەت و پارێزگاکانی ڕاسپارد کە سەرمووچە و پلەبەرزکردنەوەی شایستە بە فەرمانبەرانی دەوڵەت بدەن، هاوکات ڕێکارە کارگێڕی و داراییەکانی تایبەت بەو پرسە بەپێی ڕێنماییە بەرکارەکان تەواو بکەن.

لەلایەکی دیکەوە، وەزیری دارایی عێراق جەختی لەوە کردەوە کە هەریەک لە پرسەکانی سەرمووچە، پلەبەرزکردنەوە، کەیسەکانی دەرکردنی سیاسی و هەژمارکردنی بڕوانامەکان لە گشتاندنی وەزاریی ژمارە (137137) بەدەردەکرێن. ئامانج لەم هەنگاوە دڵنیابوونە لەوەی ئەو شایستانەی فەرمانبەران بەهۆی ڕێکارە ڕێکخستنییەکانی ناو ئەو گشتاندنەوە هیچ کاریگەرییەکیان ناکەوێتە سەر و ڕاناگیرێن.

وەزیر ڕوونیشیکردووەتەوە، بڕیاری خەرجکردنی سەرمووچە و پلەبەرزکردنەوەکان لە چوارچێوەی پابەندبوونی حکومەتدایە بە ماف و شایستەکانی فەرمانبەران، ئەمەش بەمەبەستی بەهێزکردنی سەقامگیریی وەزیفی لە دامەزراوەکانی دەوڵەتدا.