دوابەدوای هێرشەکانی ئەمریکا بۆ سەر دوورگەی قشم و هێرشە مووشەکییەکانی ئێران بۆ سەر بنکەکانی ئەو وڵاتە لە چەند وڵاتێکی ناوچەکە، نرخی نەوت رووی لە بەرزبوونەوە کرد.

نرخی یەک بەرمیل نەوتی خاوی برێنت بە رێژەی 1.47٪ بەرزبووەوە و گەیشتە 97 دۆلار و 44 سەنت. ئەمەش لە کاتێکدایە دوێنێ بە کەمتر لە 96 دۆلار مامەڵەی پێوەدەکرا.

هاوکات یەک بەرمیل نەوتی خاوی ئەمریکاش کە دوێنێ بە 93 دۆلار و 76 سەنت بوو بە رێژەی 1.50٪ بەرزبووەوە و لەئێستادا بە 95 دۆلار و 24 سەنت مامەڵەی پێوەدەکرێت.

ئەمەش دوای ئەوەدێت کە شەوی رابردوو سێنتکۆم رایگەیاند، چەند پێگەیەکیان لە دوورگەی قشمی ئێران کردووەتە ئامانج و لە بەرامبەردا سوپای پاسدارانیش باسی لەوەکرد، بە مووشەک چەند پێگەیەکی ئەمریکایان بەئامانج گرتووە.